4 nanabtuog iti buy-bust operations

CANDON CITY – Uppat a drug pushers ti pinalab-ogan dagiti polis babaen iti nagsina a buy-bust operations a naisayangkat iti tallo a lugar idi Enero 7 ken 8.

Dua a drug pushers ti naaresto babaen iti buy bust operation ditoy siudad idi Enero 7, idinto a maysa a balasang ken maysa a baro ti natnag iti ima dagiti polis-Vigan City ken Santiago, Ilocos Sur iti sabali pay a nagsina a drug operation idi Enero 8.

Nanabtuog iti dua nga aldaw nga operasion ti kapolisan da Melchor Ramirez y Garlejo, 50; ken Ryan Ismael y Garabiles, 28, agpada a residente iti Barangay Barangay, Candon City; Annaliza Munio Dela Rosa, 32, balasang, ken residente iti Barangay Ayusan Norte, Vigan City; ken ni Dennis Cuaresma y Andres, 45, residente iti Barangay Olo-Olo Sur, Santiago.

Nakumpiska dagiti joint elements ti Candon police station ken PAIDSOTG, Ilocos Sur Provincial Police Office iti ikut da Ramirez ken Ismael ti maysa nga small heat sealed transparent plastic sachet a nagkarga iti mapapati a shabu, 2 nga aluminum foil, improvised tooter nga addaan iti shabu residue, 3 lighter, 2 cellphones, ken P500.00 a naaramat a buy-bust money.

Nagballigi met dagiti nagtitipon nga elemento ti Vigan City police station, Ilocos Sur PAIDSOTG and PDEA ISSET 1 a nangkumpiska iti ikut ni Munio iti maysa a heat sealed plastic sachet a mapapati a nagkarga iti shabu; ken P1,000.00 a marked money.

Naipa-medical examination ni Munio iti Vigan City Health Office sa naipan iti police station agraman dagiti nakumpiska para iti umisu a disposision.

Kabayatanna, nakumpiska dagiti polis-Santiago babaen ti koordinasion ti PDEA Region 1 ken ti ISPPO PAIDSOTG iti ikut ni Cuaresma ti maysa a bassit a plastic sachet a nagkarga iti mapapati a shabu; P500.00 a naaramat a buy-bust money; selpon a mapapati nga inaramat ti suspek iti illegal a transaksionna; 2 a sag-P50.00; ken P1.00 bill.#