4 nanabtuog iti drug operation

SANTIAGO, Ilocos Sur – Uppat a drug pusher ti napalab-ogan iti inwayat nga operasion iti droga dagiti nagtitipon a police elements sadiay Barangay Ubbog, ditoy nga ili idi bigat ti Abril 8.

Inaresto dagiti elemento ti Santiago Municipal Police Station, Ilocos Sur Provincial Anti-Illegal Drugs Special Operation Task Group (ISPAIDSOTG), PIB ken PDEA ISSET babaen ti koordinasion ti PDEA Region 1 da Jeoffrey Habon y Vargas, 36, baro, tricycle driver, ken Mary-an Regalado y Funtillar, 36, awanan asawa, agpada a residente of Barangay Ayusan; Cris John Vargas y Ablang, 31, baro, electrician, residente iti Barangay Angkileng; ken Efren Galinatoy Almazan, mannalon, ken residente iti barangay Pila West, a barangay amin ti ili a Sta. Lucia.

Maysa a confidential agent ti nagpammarang a gumatang iti shabu ken ni Habon ket inyawatna ti namarkaan a kuarta kalpasan nga inted ni Regalado ti maysa a plastic sachet a naglaon iti masuspetsa a shabu.

Dagus nga inaresto dagiti operatiba ni Habon ket nakumpiska iti ikutna ti P500.00 a marked money, 5 a plastic sachet a naglaon iti mapapati a shabu, cal 380 nga awanan serial number, magazine assembly, 7 a bala ti cal. 380, ken drug paraphernalia.

Nakumpiska iti ikut ni Galinato ti dua a plastic sachet a naglaon iti mapapati a shabu, idinto a 3 a plastic sachet a nagkarga iti mapapati a shabu, cutter, folded fliers ken getteng ti naalda iti ikut ni Vargas.

Nakalista dagiti suspek a drug personalities iti Sta. Lucia, SPAIDSOTG ken PDEA nga agop-operasion iti Ilocos Sur.#