4 natay, 2 nasugsugatan gapu iti aksidente iti lugan

CAMP ELPIDIO QUIRINO, BANTAY, Ilocos Sur – Uppat ti natay iti aksidente iti lugan a napasamak iti Candon City, Vigan City ken daytoy nga ili idi Hulio 27 ken 30.

Iti report a dimmanon iti Provincial Police Office ditoy, natay gapu iti aksidente iti lugan sadiay Candon City idi Hulio 27 da Tommy Balbin, Jr. y Galaites, 18, baro; ken Vergel Reyes, agpada a residente iti Barangay Darapidap, Candon City; ni Benjie Flores Fieldad, 19, baro, iti aksidente sadiay Barangay San Julian, Vigan City; ken Mark Anthony Pantura Cortez, 17, baro, iti aksidente sadiay Sta. Lucia, Ilocos Sur.

Nasugatan met da Jojo Baricaua, 25, ken Joel CastaƱeda, agpada a back rider idi mapasamak dagiti aksidente.

Iti aksidente iti Candon City a napasamak idi alas 11:00 ti rabii ti Hulio 26, mapapati a saan a nakalkula ni Tommy Balbin, Jr. ti pagkurbaan sadiay Barangay Darapidap a puon ti pannakadungpar ti minanehona a Euro motorcycle iti kongkreto a poste ti elektrisidad a nagresulta iti pannakaipalladawna agraman dagiti nakikalubbon a da Vergel Reyes ken Jojo Baricaua.

Naitaray dagiti tallo iti Saint Martin de Porres Hospital, Candon City ngem naideklara ni Reyes a DOA.

Pimmusay ni Balbin bayat a matamtaming iti ospital idinto a maob-obserba ni Baricaua a nagsagrap iti natukkol a makannawan a sakana, dunor iti ulo ken sugat iti nadumaduma a paset ti bagina.

Segun iti doktor a nangtaming kadakuada, nakainom dagiti biktima iti arak, kasta met nga awan ti aruatda a helmet idi mapasamak ti aksidente.

Iti met aksidente a napasamak iti Vigan City, iwaywayat ni Benjie Flores Fieldad, 19, ti test drive iti para lumba a motorsiklona a Honda XRM 125 iti kalsada a sakup ti Barangay San Julian Sur ket mapapati a gapu iti kinapegges ti panagpatarayna, napukawna ti kontrol ti manibela a puon ti panangdungpar ti lugan iti kongkreto a poste ti elektrisidad.

Naitaray ni Flores iti Metro Vigan Cooperative Hospital, Bantay, ngem indeklara ti doktor a nangtaming kenkuana nga awanen ti biagna.

Kabayatanna, saan a naiyabot ti biag ni Mark Anthony Pantura Cortez, 17, baro, iti Sta. Lucia District Hospital gapu kadagiti nakaro a dunor a sinagrapna kalpasan a dinungpar ti Euro Sport motorcycle a minanehona ti kongkreto a poste ti maysa nga arko sadiay Sitio Madsarang, Barangay Palali Sur, Sta. Lucia, Ilocos Sur.

Manipud iti nasao nga ospital, naiyalis met iti Candon City Hospital ni Joel CastaƱeda para iti naan-anay a pannakataming dagiti sugatna.#