4 sabali pay a drug couriers, natiliw iti buy-bust operation

SAN FERNANDO CITY, La Union – Sabali pay a grupo dagiti maatap a drug couriers ti nanabtuog iti ima dagiti polis kabayatan ti entrapment operation nga insayangkatda idiay Barangay Cana-oay, ditoy siudad itay nabiit.

Iti reportda ken ni Police Chief Supt. Ricardo C. Marquez, police regional office 1 director, kinuna dagiti nagtipon nga operatiba ti Regional Anti-Illegal Drugs Special Operation Task Group 1 (RAIDSOTG1), Philippine Drugs Enforcement Agency-RO1, ken San Fernando City Police Station a naaresto bayat ti entrapment operation nga insayangkatda idi tengnga ti rabii ti Septiembre 1 da Miriam Daguim, 24, awanan asawa, ken residente Brgy. San Francisco, ditoy siudad;  Dondon E. Guerrero, 34 years old, naasawaan, mapapati a live-in partner ni Marian, ken residente iti Brgy. San Isidro, Candon City; Melchor D. Lorenzo, 53 , baro, mannalon ken residente iti Brgy. Rubio, Galimuyod, Ilocos Sur; ken Jerry M. Salingbay, 36, ken residente iti Poblacion, Banayoyo,Ilocos Sur.

Segun iti polis, karaman dagiti uppat a natiliw iti watchlist ti PDEA a nabayagen a sipsiputan ti kapolisan.

Nakakumpiskar dagiti polis iti ikut dagiti suspek ti tallo a medium heat-sealed plastic sachet a naglaon iti mapapati a shabu, marked money a naaramat iti buy-bust operation, sumagmamano a selpon ken dadduma pay nga alikamen.

Naipan dagiti suspek iti RAITSOTG1 para iti dokumentasion idinto a naipan met dagiti nakumpiskar nga ebidensi iti PDEA-RO1 para iti laboratory examination.

Napilaan dagiti suspek iti kaso a panaglabsing iti RA 9165 wenno Dangerous Drugs Act of 2001.

Immun-una ngem daytoy, balligi a naisayangkat ti buy-bust operation iti maibilang a shabu queen ken tallo a kakaduana sadiay Zandueta Street, Barangay 1, ditoy idi August 17.

Napilaanen iti kaso a panaglabsing iti Sec. 11, Article II ti RA 9165 ken panaglabsing iti Section 5 kas intuding ti Section 36 ti Article II maikontra kada Micaela M. Paloma alias “Mimi”, Edgar J. Gapasen alias “Pangyaw”, Herriet D. Pimentel alias “Kiray”, Rodolfo A. Baking idinto a naipaima ti kaduada a menor de edad iti Women and Children’s Protection Desk (WCPD) iti San Fernando City

Am-ammo ni Paloma a big time drug courier manipud iti Metro Manila nga agitultulod iti droga iti La Union, segun iti report ni Police Superintendent Rolly A. Bersola, Action Officer ti Regional Anti-Illegal Drugs Special Operations Task Group (RAIDSOTG) ken ni Marquez.#