4 tattao, natiliw gapu iti panaglabsingda iti gun ban

BANGUED, Abra – Uppat a tattao ti inaresto dagiti polis itay nabiit gapu iti panagsalungasingda iti Comelec gun ban.

Segun iti report manipud iti Police Regional Office Cordillera, naaresto da Marjovie Sibayan, 44; Isagani Joson, 42; Loreto Balucas, 38, ken ni Leonardo Parado, 33, agpapada nga agnaed iti Lagayan, Abra kalpasan a nakakumpiska dagiti polis iti ikutda kadagiti paltog a nagkarga iti bala.

Naaresto dagiti suspek iti checkpoint nga impasdek ti grupo ti Bangued Municipal Police Station ken Special Action Force iti Abra-Ilocos Sur road sadiay Ubbog-ipcan ditoy nga ili.

Ngem temporario a nawayawayaan met laeng dagiti suspek kalpasan a nagpiansada.#