Footer

4 tattao, pinaltogan riding in tandem

CABUGAO, Ilocos Sur – Uppat a tattao ti nagandat ti biagda babaen dagiti riding in tandem iti nagsina a pammaltog a nagsaruno a naisayangkat iti dua a barangay ditoy nga ili idi Nobiembre 8 ken 9.

Iti umuna a pammaltog a napasamak iti provincial road ti Sitio Cabaroan, Barangay Cuancabal, nagbalin a biktima da Jose Ilar y Asuncion, 47, naasawaan, BPAT member, ken ni Ronie Redolfa y Sunio, 30, naasawaan, tricycle driver ken  residente iti nadakamat a barangay.

Segun iti inbestigasion, agdaldaliasat dagiti biktima a nakalugan iti Euro 100 motorcycle iti provincial road ti nadakamat a barangay, a naggapu manipud iti San Juan, Ilocos Sur, idi sinaruno ida ti motorsiklo a nagluganan dagiti di nabigbig a suspek sada pinaltogan dagiti biktima iti sumagmamano a beses a nakapuntaan ti makannawan a dapan ni Redolfa ken makannigid a saka ni Ilar.

Naglibas dagiti suspek a nagpalaud.

Mapapati a cal.  45 ti naaramat iti pammaltog kas maibasar iti dua a kapsula a nasarakan dagiti nagresponde a polis iti crime scene.

Kabayatanna, naireport a nagandat ti biag da Hanley Tapuro y Ines, 28, naasawaan, ken residente iti Barangay Teppeng, Sinait, Ilocos Sur ken  ni Richard Borja y Yagin, 34, naasawaan, ken residente iti Barangay Calanutian, Sinait iti national highway a sakup ti Barangay Pug-os, ditoy nga ili idi agarup 8:20 ti sardam ti Nobiembre 9.

Rimmuar iti inisial nga inbestigastion dagiti polis nga agpaamianan a direksion dagiti biktima a nakalugan iti motorsiklo a Rusi ket idi makadanonda iti Barangay Pug-os, pinaltogan ida dagiti saan pay a nabigbig a suspek ket nagsagrap ni Tapuro iti sugat iti makannigid a takiag ken makannigid a sakana.

Saan  a naan-ano ni Borja.

Mapapati a cal 5.56 mm tin naaramat iti pammaltog kas maibatay iti 9 a kapsula a narekobre dagiti nagresponde a polis iti crime scene.

Di pay ammo no ania ti motibo ti pammaltog.

Iti pannakaisurat daytoy, agtultuloy ti panagpalutpot dagiti polis mainaig iti dua a pammaltog.#

 

Riri ti agassawa, nagtungpal a riri ti pamilia

 

BANTAY, Ilocos Sur – Riri laeng ti agassawa, nagramaram iti pamilia a nagtungpal iti pannakatakbat ti maysa.

Iti report a naawat ti Bantay PNP, agarup 7:30 ti sardam ti Nobiembre 9, idi nagriri dagiti agassawa a Benito Dellona y Siazon, 48, ken ni Marga Dellona y Velasco, 46, agpada a residente iti Barangay Bulag West.

Napan naganawa ni Mariano Velasco, ama ni Marga, ket dinamagna no ania ti problemada nga agassawa.

Mapapati a nakainom ni Dellona ket pinabaribaranna ti katuganganna a nakarurodan met ti lakay ket naisaritana ti insidente ken ni Nestor Velasco, anakna, a nakainom met iti dayta nga oras.

Nagsubli dagiti dua iti balay da Dellona ket mapapati a kinabilda daytoy. Nakirangas met ni Dellona ket kinumpayna ni Nestor. Natagbat met ti ulo ken tengnged ni Benito.

Intaray dagiti nagresponde a polis dagiti nadunor iti Gabriela Silang General Hospital para iti pannakaagasda.

Awan ti narekobre dagiti polis  nga armas.

Kabayatanna, tallo a lallaki ti nainbolbar iti pannagbat sadiay Zone 2 Barangay Paypayad, Candon City idi malem ti Nobiembre 10.

Nainaganan ti biktima ti pannagbat a ni Alex Gasalao y Usanestre, 41, naasawaan, mannalon ken residente iti nadakamat a barangay.

Segun iti report, mapapati a napan nagprobokar ken nagkarit ni Alex Gasalao kadagiti naggiinom iti uneg ti pagtaengan ni Nelson Gasalao.

Mapapati a sinaruagan pay ni Alex iti water pot a nagkarga iti agburburek a danum ni Celestino Gasatan y Villanueva, 47, naasawaan.  Gapu iti dayta, kinamat ni Noli Gasatan, kabsat ni Celestino, ni Alex agingga iti compound daytoy sana tinagbat babaen iti bolo a nagsagrapan daytoy iti sugat iti ulo ken garumiad iti makannawan a tianna.

Nagsagrap met ni Noli Gasatan iti sugat iti makannigid a tanganna.

Naitaray dagiti nasugatan iti Candon City Hospital ken Resonable Hospital para iti pannakaagasda.

Kanaig daytoy, nayendorso iti opisina ti city prosecutor ti Candon City ti kaso a frustrated homicide maikontra ken ni Noli Gasatan.#

 

 

 

 

 

POLICE REPORTS

 

Alad nabato iti eksplosibo

 

SAN ILDEFONSO, Ilocos Sur  – Di pay ammo ti motibo iti pannakabato iti eksplosibo ti alad ti maysa a residente iti Barangay Busiing Cen-Sur, ditoy nga ili idi rabii ti Nobiembre 11.

Iti panagimbestiga dagiti polis, napabettak ti maysa nga explosibo ti alad ti balay a kukua ni Cleofe Racadio a nakadadaelan daytoy babaen ti di nabigbig a tao a nakalugan iti motorsiklo.

Mapapati a naglibas ti suspek a naglugan met laeng iti motorsiklo a nagturong iti laud a direksion.

Insubmite ti EOD team ti provincial police office nga indauluan ni Police Supt. Jonathan Calixto dagiti naalada a soil sample, nausar a rubber, shrub black powder ken paset ti nadadael nga alad iti provincial crime laboratory office iti Bulag, Bantay para iti pannakaamirisda.

Madama ti panagpalutpot dagiti inbestigador no asino ti nagpabettak iti eksplosibo.#

 

2 nasarakan a bangkay, naireport iti polis

 

SUYO, Ilocos Sur – Dua a bangkay ti lalaki ken babai a mapapati a biktima ti pammagsol ti naireport a nasarakan sadiay Sitio Baudan, Barangay Man-atong, ditoy nga ili idi malem ti Nobiembre 13.

Nabigbig dagiti biktima a da Roberto Macusi y Dacua, 42, truck driver ken residente iti Barangay Calumbaya, Bauang, La Union ken Erma Marinas y Orina, 35, ken residente iti Sitio Naiba, Barangay Malaya, Cervantes, Ilocos Sur.

Iti panagimbestiga dagiti polis, naammuan nga agpa-Tagudin, Ilocos Sur dagiti biktima a nakalugan iti Izusu Canter tanker  truck ket agdaldaliasatda iti nadakamat a barangay idi pinara ida dagiti di nabigbig a suspek sada binagbagsol dagiti biktima a nagsagrapanda kadagiti sugat iti nadumaduma a paset ti bagida.

Di pay ammo no ania ti motibo ti pannakabagbagkong dagiti dua.#