4 videoke bars, naraut; 14 GROs naaresto

CANDON CITY – Uppat a videoke bars ti rinaut dagiti polis  ken opisina ti DSWD ken Salun-at a nakaarestuan ti sangapulo ket uppat a babbai nga agpapaay a Guest Relation Officers (GROs), receptionists ken entertainers iti Barangay Paras ditoy siudad idi rabii Oktubre 7.

Nagsasaganad a rinaut dagiti polis, Candon City Health ken DSWD-Candon ti Chen-Chens Videoke Bar a kukua ni Lucida Acdal, Apple Disco Bar a kukua ni Mercy Ching, MJ Videoke Bar, ken Jhovel’s Videoke Bar a kukua ni Patricia Fabro babaen ti Oplan Magdalena iti panangidaulo ni PCI Winnie de Vera, deputy Chief of Police ti Candon PNP ket inarestoda dagiti 14 a babbai nga agpapaay kadagitoy a paginuman kalpasan nga awan ti maipakitada a health permit.

Kinuna ni Angie Rubang, Sanitary Inspector ti Candon City Farmers Health Center, a kasapulan nga agdalan dagiti GRO iti pap smear iti mamindua iti makabulan tapno masigurado nga awan sakitda a HIV, hepa, syphilis, gonorhea ken dadduma pay a sexually transferred disease (STD). (Danny Antalan)