40 nakalangen babai a natay iti rabies, nagpabakuna

BACNOTAN, La Union – Uppat a pulo a tattao a nakalangen ti babai a mapapati a natay gapu iti rabies ti nagpabakuna ditoy.

Karaman kadagiti nagpabakuna ti 24 a kameng ti pamilia ni Virginia Mondina, residente iti Barangay Bulala ditoy nga ili, ken dagiti 16 nga empleado iti Bacnotan District Hospital amangan no naakaran ida ti biktima a mapapati a natay gapu iti rabies itay nabiit.

Mapapati a nagparang dagiti sintomas ti rabies ken ni Mondina kas iti panagbutengna iti lawag ken danum bayat ti pannakatamingna iti Bacnotan District Hospital.

Naduktalan a kinagat ti maysa nga uken ni Mondina idi 2012 ket natay ti aso kalpasan ti sangapulo ket uppat nga aldaw.

Pimmusay ti biktima idi naiyakar iti Ilocos Training and Regional Medical Center iti San Fernando City.#