44 refrigerators, naited kadagiti day care centers

TAGUDIN, Ilocos Sur – Saggaysa a refrigerator ti impaay ti gobierno munisipal idi Enero 24 para kadagiti amin a day care centers ditoy nga iliĀ  tapno presko dagiti taraon ken inumen dagiti agbasbasa kadagitoy a pagadalan.

Kinuna ni Mayor Roque Versoza, Jr. a naggapu ti naigatang kadagiti refrigerator iti P1 milion nga inabak ti ilida kas Pamana ng Lahi awardee.

Mismo a dagiti 43 a barangay kapitan ti nangawat iti ref manipud iti mayor. Agdagup amin iti 44 dagiti ref a naited agsipud ta adda maysa a barangay a dua ti day care centerna.

Kinuna ti mayor a napagnunummuanda a maigatang ti inabakda iti pasalip iti refrigerator tapno adda pakaikabilan dagiti taraon dagiti ubbing tapno mapagtalinaed a preskoda.

Kinuna met ni Municipal Social Welfare and Development Officer nga immun-unan a naipaay kadagiti day care centers ti maysa a telebision ken DVD tapno makatulong iti panagbasa dagiti ubbing.

Malaksid iti ref, adda pay naiwaras a gatas para iti feeding program dagiti ubbing ditoy.#