45th GAWAD Saka Awards: 23 indibidual, grupo, napadayawan

PASAY CITY – Maysa a mannalon manipud Barangay Tapulao, Orani, Bataan ti nangidaulo kadagiti 22 a sabali pay nga immawat iti pammadayaw manipud iti Department of Agriculture iti seremonia a naangay iti Philippine International Convention Center, Pasay City idi Disiembre 9, 2015.

Indauluan ni Reynaldo Diaz, top rice producer, dagiti 13 nga indibidual a mannalon ken 14 a grupo wenno asosasion a pinadayawan ti DA iti 45th Gawad Saka nga immawat iti presidential trophy ken pammigbig gapu iti naisangsangayan a nagapuananda a nangidur-as iti sektor ti agrikultura iti napalabas a tawen.

Segun iti DA, karaman kadagiti napadayawan ti maysa nga agtaltalon a pamilia manipud iti Sto. Nino, South Cotabato a nangimaton iti lima-ektaria nga integrated farm ken maysa a mangisursuro koma ngem inkeddengna nga ituloy ti talonen ti tawidna manipud iti pamiliana.

Malaksid iti presidential trophy ken presidential citation, immawat ni Diaz, kaduana ni Joel Cabanayan, top corn producer, ken 12 pay nga individual winners iti P200,000.00 cash. Dua pay nga nangabak iti indibidual a kategoria ti immawat iti P900,000.00 kas grant ken P100,000.00 gapu iti nagapuananda iti tay-ak iti siensia ken panagsukisok.

Immawat amin a group winners, malaksid ti Outstanding Fisheries and Aquatic Resources Management Council (FARMC), iti sag-P50,000.00 cash ken P300,000.00 kas project grant ken presidential trophy ken citation.

Inyawid ti FARMC ti P450,000.00 cash award, presidential trophy ken citation.

Dagiti dadduma pay a nangabak iti babaen ti indibidual a kategoria: Outstanding Coconut Farmer – Edgar Buhian, Misamis Oriental; Sugarcane Farmer – Girlie Adug, North Cotabato; High Value Crop Farmer – Melchor Diego, Bulacan; Agricultural Entrepreneur – Ricardo Tolentino, Ilocos Norte; Organic Farmer – Valerio Ramos, Benguet; Small Animal Raiser – Joel Callano, Surigao del Sur; Large Animal Raiser – Esperidion Acla, Pagadian City; Capture Fisheries – Jose Alburo, Occidental Mindoro; Aquaculture – Christopher Cangco, Pampanga; Young Farmer/Fisherfolk – Rovelle Mendoza, Cagayan; Agricultural Researcher – Wilhelmina Castaneda, Ilocos Norte; Agricultural Scientist – Dr. Allan Dargantes, Bukidnon.
Dagiti nangabak iti Group categories: Outstanding Young Farmer/Fisherfolk Organization – Nature Friendly 4H Club, Cagayan; Farm/Fisherfolk Family – Mr. & Mrs. Antonio Lentija, South Cotabato; Rural Improvement Club (RIC) – Bagacay RIC, Sorsogon; Small Farmer/Fisherfolk Organization – Santiago Amos Credit & Development Coop (SACDECO), Isabela; Provincial Agricultural & Fishery Council – Quirino Provincial Agricultural and Fishery Council (PAFC), Quirino; City/Municipal Agricultural & Fishery Council – Science City of Munoz Agricultural & Fishery Council, Munoz, Nueva Ecija; Barangay Food Terminal (Non-LGU Operated) – St. Joseph Parish Multipurpose Cooperative Belance BFT – Nueva Vizcaya; Barangay Food Terminal (LGU Operated) – San Fernando BFT – San Fernando, Masbate; FARMC – Bindoy FARMC, Negros Oriental. (Tawid News)