5 a babbai, nagipasupli peke a tseke

TAGUDIN, Ilocos Sur – Maysa a pagtagilakuan ditoy nga ili ti nagbalin a biktima ti lima a babbai a nagipasupli iti peke a tseke dagiti polis idi malem ti Hunio 4.

Nagpulong iti polis ni Loida Morteza y Hernandez, 33, naasawaan, checker iti Zeny’s Super Mart a masarakan iti Barangay Rizal, ditoy nga ili a peke dagiti tseke nga impasupli dagiti lima a babbai a nagpammarang a kustomerda nga agpateg amin iti nasurok a P55,000.

Iti inisial a panagimbestiga dagiti polis, naggigiddan a simrek iti pagtagilakuan dagiti suspek ket impadasda nga ipasupli dagiti tseke ken ni Morteza.

Kinuna ti biktima a nagpammarang dagiti suspek nga asawa/ina dagiti nainagan iti tseke nga SPO2 Ernesto Gomez Villanueva, SPO2 Zenaida Mendoza Soriano, SPO2 Glenda Bergado Villanueva, SPO1 roberto Lopez Soriano ken SPO1 Jaime Nicolas Sagun.

Segun ken ni Morteza, bineripikana dagiti tseke sana imballakad kadagiti babbai a gumatangda iti groseria nga agpateg iti 10% iti  balor dagiti tseke tapno mapasuplianda.

Aggatad  dagiti tseke dagiti SPO2 iti P11,936.50 idinto a P11,299.50 para iti SPO1.

Idi awanen dagiti suspek, natakuatan ti checker nga awan dagiti polis a nakanagan iti tseke kasta met iti nailanad nga adresda.

Agtultuloy ti panagimbestiga dagiti polis mainaig iti daytoy a panangallilaw.#