Footer

5 balay, sinukisok dagiti polis; paltog, balbala, nakumpiska

SAN JUAN, Ilocos Sur – Lima a pagtaengan ti sinukisok dagiti pannakabagi ti linteg iti las-ud ti makalawas kas paset ti napingpinget a kampaniada maikontra iti agraira nga armas iti probinsia.

Kas maibatay iti report manipud iti Provincial Police Office, uppat a balay ti sinukisok dagiti polis sadiay Sinait ken Burgos idi Marso 14 ken maysa a balay sadiay San Juan idi Marso 20.

Naggiddan ti panagsukisok nga insayangkat dagiti nagtitipon nga elemento ti RID-PRO1, SOT-CIDG1, RPSB1, PIB-ISPPO ken Sinait Police Station iti balay da Erwin Encarnacion, 40, naasawaan, mannalon/electrician ken Joseph Encarnacion, agpada a residente iti Barangay Ubbog, Sinait, Ilocos Sur babaen ti bileg ti search warrant nga inyisio ni Acting Executive Judge Renato Pinlac ti Branch 57, San Carlos City, Pangasinan.

Nakumpiska iti balay ni Erwin ti maysa a cal. 45 colt pistol, SN#70N965368 nga addaan iti FA License No. 539951I1024086 iti babaen ti nagan ni Dionisio Ilar y Encarnacion; 8 a bala para cal. 45; 3 bala para cal. 32; 3 bala para 40 mm (M203); ken saggaysa a magazine assembly para M16 ken cal. 45.

Negatibo ti resulta ti panagsukisok iti balay ni Joseph.

Naipaiman ti kaso a panaglabsing iti RA 10591 kontra ken ni Erwin iti opisina ti provincial prosecutor, Vigan City.

Idi agarup 12:00 ti aldaw daytoy met laeng a petsa, sinukisok dagiti nagtipon nga elemento ti CIDG, PIB ken Burgos police station ti balay da Rodolfo Esteban Duque ken Leonardo Esteban Duque sadiay Barangay Subadi Sur, Burgos, Ilocos Sur babaen ti search warrant nga inyisio ni Judge Sixto D. Diompoc ti RTC Branch 72, Narvacan, Ilocos Sur.

Nakakumpiska dagiti polis iti maysa a Colt M16 rifle (5.56), 4 a long empty magazine, maysa nga empty short magazine para M16 ken 29 a bala para M16 iti balay ni Rodolfo ngem negatibo ti panagsukisok iti balay ni Leonardo.

Nupay awan a presente dagiti dua a bumalay, sinaksian dagiti barangay officials ti nasao a panagsukisok.

Napilaan metten ni Rodolfo iti kaso a panaglabsing iti RA 10591 iti opisina ti provincial prosecutor, Vigan City.

Kabayatanna, pito a kapsula ti nasukalan dagiti otoridad a naikabil iti blue pouch iti uneg ti kabinet iti kuarto ni Marius Yadao, 42, naasawaan, ken residente iti Barangay Sabangan, San Juan, bayat ti panagsukisokda iti balay daytoy idi agsapa ti Marso 20 babaen ti bileg ti search warrant nga inyisio ni Judge Nida B. Alejandro ti RTC Branch 24, Cabugao, Ilocos Sur.

Sinaksian da Barangay Kagawad Benicio Salvador ken Barangay Tanod Virgilio Ramos ti panagsukisok dagiti elemento ti ISPPSC, PHPT ken San Juan police station nga indauluan da PI Joseph Yatco ken PI Valoria babaen ti direkta a superbision ni Police Supt. Elpidio Nartatez, OIC, ISPPSC.

Naipan dagiti kapsula iti ISPPSC sada naipaima iti crime laboratory para iti cross matching ken ballistics examination.#