5 menor de edad a nagtakaw iti fast food chain, naipaima iti polis

NARVACAN, Ilocos Sur – Lima a suspek iti panagtakawĀ  iti maysa a fast food chain sadiay Barangay San Jose ditoy nga ili ti naipaima iti polis idi aldaw ti Agosto 18.

Mismo a da Barangay Captain Melecio Viloria, Brgy. Kagawad Aiko Valera ken Chief Tanod Rudy Casia ti nangkuyog kadagiti suspek a dimmatag iti police station ditoy maysa nga aldaw kalpasan aĀ  tinakawanda ti Big Mack Fast Food a masarakan iti sanguanan ti Narvacan South Central School, Barangay San Jose.

Kadua pay dagiti di nainaganan a suspek nga agpapada amin a menor de edad ken residente iti Barangay San Jose, dagiti nagannak kadakuada idi dimmatagda iti police station.

Mapapati a sinerrek dagiti suspek ti nasao a fast food chain idi rabii ti Agosto 17 wenno agsapa ti Agosto 18 ket kinurimesda ti maysa a karton a Chuckie chocolate drink nga agbalor iti P800.00; 5 boxes nga sliced cheese nga aggatad iti P720.00; 3 bunches sliced bread nga aggatad iti P50.00 ken 2 packs HP patties nga agbalor iti P500.00.

Naduktalan ti panagtakaw idi mapan aglukat ni Mary Jane Cabigas y Orpilla, 29, service crew ti nasao a food chain idi bigat ti Agosto 18 ket nakitana a nalettat ti padlock ti ridaw.

Segun iti report, narekobre iti ikut dagiti suspek ti sumagmamano a tinakawda.

Binayadan dagiti nagannak dagiti saanen a naisubli a tinakaw dagiti menor de edad.

Nagpirma pay dagiti suspek iti promissory note iti police blotter a saandan nga uliten ti inaramidda a sinaksian dagiti nagannak kadakuada ken dagiti barangay officials.

Kalpasan a naipaima dagitoy iti MSWD officer para iti pannakabagbagada ken nairekomenda a mangipaayda iti serbisio iti komunidad, naisublida iti kustodia dagiti nagannak kadakuada.#