5 menor de edad, natiliw a nagtakaw

STO. DOMINGO, Ilocos Sur – Lima a menor de edad ti naapput dagiti polis bayat ti panagtakawda iti tiendaan publiko ditoy nga ili idi alas dies y media ti rabii ti Oktubre 12.

Segun ti report ti PNP Sto. Domingo, naduktalan dagiti agrekrekorida a Barangay Talna dagiti suspetsa nga agtawen iti 15, 16, ken 17 ken agindeg iti Metro Poblacion a sakupen ti Barangay San Pablo ken Vacunero, a nagtakaw iti tiendaan ket nakakumpiskada iti ikut dagitoy iti assorted grocery items, aruaten nga RTW, sandals ken panty.

Iti pannakaisurat daytoy, maisagsaganan ti pannakaipaima dagiti menor de edad iti DSWD.#