CANDON CITY – Lima a lallaki a pasig a menor de edad ti natnag iti ima dagiti intel operativesĀ ditoy siudadĀ bayat ti panagsusopda iti maiparparit a droga idi rabii ti Marso 7.
Iti report a dimmanon iti police provincial office, idi agarup 9:45 ti rabii ti nadakamat a petsa, madama ti mobile patrolling dagiti intel operatives ti Candon Police Station iti babaen ti direkta a superbision ni Police Supt. Richmond Laranang Tadina, hepe ti polis, idi nasalamaanda ti grupo dagiti lallaki nga agsigsigarilio bayat a nakatugawda iti akinlaud nga abaga ti San Juan Street, iti nagsulian ti Quirino Boulevard, Barangay San Jose ditoy.
Nagsuspetsa dagiti polis iti ar-aramiden dagiti lallaki isu nga inasitganda ti grupo ket ditoy a naduktalanda a maysa nga improvised a tubo manipud iti aluminum foil a naglaon iti masuspetsa a bulong ti marihuana nga addaan fruiting tops ti pagsisinnublatan a pagsussusopan dagiti lallaki.
Agpapada a menor de edad dagiti suspek a pakaibilangan da Adrian Manzano y Salacyao, 15; Eric German y Lalata, 15; Mark Chester Abaya y Ubuan, 17, David Paul Antor y Gonzalo, 17, agpapada amin a residente iti Barangay San Jose, Candon City, Ilocos Sur.
Nakasarak pay dagiti polis iti nagtugawan dagiti suspek iti maysa a heat sealed a plastic sachet a nagkarga iti mapapati a bulong ti marihuana nga addaan fruiting tops ken maysa a cricket lighter.
Naipaiman iti opisina ti city prosecutor iti Candon City ti kaso a panaglabsing iti RA 9165 maikontra kadagiti suspek.
Kabayatanna, dua a kapuon ti marihuana ti naireport a nasarakan iti bakante a lote sadiay Sitio Bantay, Barangay Caterman, Candon City.
Segun iti report, nadiskubre ni Richard Gaoat y Gamilde, 21, baro, ken residente iti nadakamatĀ a barangay dagiti 2 kapuon ti maiparparit a mula bayat ti panagkolektana iti kayo a pagtungo iti turoden a paset ti nasao a lote.
Pinarut dagiti polis dagiti dua kapuon a mula sada impan iti Candon City police.#