5 nadundunor iti 2 aksidente

CANDON CITY – Dua ti napasamak nga aksidente iti masimsimpa a kalsada iti Barangay Calaoaan ditoy siudad itay lawasna.

Iti immuna nga aksidente, nayospital ni Vladymir Areola, residente iti Barangay Paduros, Burgos, Ilocos Sur ken dagiti kinalubbonna iti motorsiklo a da Rommel Dato, Racquel Areola, ken Lovely Areola..

Segun iti report, nagsardeng ti van a minaneho ni Victor Gao-ay, 55, residente iti Sevilla, Sta. Cruz, Ilocos Sur, idi nagsilaw ti nalabaga ti traffic light iti masimsimpa a kalsada ket mapapati a pinaubetan a dinungpar ti motorsiklo.

Iti sabali nga aksidente, dinungpar ti Lifan a motorsiklo a minaneho ni Danny Barcena, residente iti Ayudante, ditoy met laeng a siudad, ti steel barrier a naipasdek iti masimsimpa a kalsada a puon ti nakadunoranna.

Naitaray ti biktima iti Candon City Hospital.#