5 nanguraga iti tinakawda a baka, napakawan

MAGSINGAL, Ilocos Sur – Saanen a nagdarum pay ti akinkukua iti baka kalpasan nga inkari dagiti suspek a bayadanda ti tinakaw ken pinartida a bakana.

Iti naaramid a konprontasion iti Lupon Tagapamayapa, nagpirma ni Herlinda Villamar y Atanacio, 56, naasawaan, ken residente iti Sitio Ubbog, Barangay Patong iti Certificate of Disinterest to File a case maikontra kadagiti suspek a Dennis Paz y Rosario, 34, residente iti Sitio Cabuluan; Fermin Ustari, y delos Santos, 48, residente iti Sitio Lattao; Archie Garcia y Garcia, 33; Alexis Aquitania y Lira; ken Nelson Quilinderino, residenteda amin iti Barangay Patong, Magsingal, Ilocos Sur kalpasan nga inkari dagitoy nga agbayadda iti P15,000.00 kas naituding a balor ti pinartida a baka.

Inadmitir dagiti suspek nga inukodda ti baka ni Villamar idi parbangon ti Septiembre 19 bayat a nakawayway daytoy sadiay Sitio Ubbog, Barangay Patong, Magsingal sada pinarti ken inuraga.#