5 natakaw a motorsiklo, narekobre dagiti otoridad iti Alilem

ALILEM, Ilocos SurĀ  –Ā  Lima a motorsiklo a mapapati a tinakaw ti maysa a grupo nga agdakdakiwas iti Region 1 ken Baguio City ti narekobre dagiti nagtitipon nga elemento dagiti polis iti insayangkatda nga operasion idi agtapos ti bulan ti Abril.

Nainaganan dagiti suspek a mapapati a nainbolbar iti pannakatakaw ken nagilako dagiti narekobre a motorsikloĀ  da Loreto Aquino, mapapati a pangulo ti robbery-hold-up gang nga agdakdakiwas iti Region 1 ken Baguio City, ken maysa a Sonny Espada a napapatay iti maysa nga engkuentro kadagiti polis.

Uppat pay a tattao a mapapati a gimmatang kadagiti nadakamat a motorsiklo ti addan iti ikut ti RHPG.

Natuntonan dagiti nagtitipon a police elementsĀ  ti Bacnotan Police Station, Regional Highway Patrol Group ken ti police station daytoy nga ili, dagiti uppat a natakaw a motorsiklo a nailako ditoy nga ili, idinto a ti maysa ket mapapati nga adda iti ikut ti maysa a kabagian ti maysa a suspek iti panagtakaw kadagiti motorsiklo.

Maipalagip nga inaresto dagiti polis idi Abril 23 ni Aquino iti naipasdek a police checkpoint iti Barangay Sayoan, Bacnotan, La Union.

Adda standing warrant of arrest maikontra ken ni Aquino a pakaibilangan ti panaglabsing iti RA 8294, panaglabsing iti Anti-Carnapping Law ken kaso nga slight physical injuries.

Nasalpakan pay ni Aquino itiĀ Ā  panaglabsing iti Comelec gun ban kalpasan a nakakumpiska dagiti polis iti ikutna iti maysa a carbine rifle nga addaan iti 11 a bala idi maaresto iti police checkpoint sadiay Bacnotan, La Union.

Intuding ti korte ti panagpiansana iti P164,500.00 para iti temporario a pannakawayawayana ngem napaay ni Aquino a mangidatag iti piansana isu a naiyalis manipud iti Bacnotan Police Station iti La Union Provincial Jail.#