5 nayospital iti aksidente ti lugan

STA. CRUZ, Ilocos Sur – Lima a tattao ti naiyospital idi dinungpar ti maysa a motorsiklo ti maysa a bisikleta iti Luisa road, Barangay Sidaoen, ditoy nga ili idi agarup 6:15 ti malem ti Hunio 6.

Naitaray iti Tagudin General HospitalĀ  sa naiyalisda iti ITRMC iti San Fernando City da Warlito Gazmen y Javonillo, 44, naasawaan, fish vendor ken residente iti Barangay Pinipin, ditoy nga ili; ti asawana a ni Josie; ken ti anakna a ni Warren, 12, gapu kadagiti sinagrapda a sugat iti nadumaduma a paset ti bagida.

Naipan met iti Sta. Lucia District Hospital da Jumar Corpuz y Cabuenas, 13, out of school youth ken residente iti Barangay Pilar, ditoy met laeng nga ili, ken ti insakayna a ni Emil Villalobos y Figuracion, residente iti Barangay Gabor, Sta. Cruz.

Naammuan iti inbestigasion nga agpada nga agpalaud a direksion dagiti dua a lugan idi aksidente a dinungpar ti motorsiklo a minaneho ni Gazmen ti kutit ti bisikleta a minaneho ni Corpuz ti puon ti nakaikrasan dagiti naglugananda.#