Footer

5 nga Ilocos Surians, immawat iti Pres. Elpidio Quirino Medallion

VIGAN CITY – Uppat nga opisial ken maysa a kameng ti non-government organization ti resipiente ti Pres. Elpidio Quirino Medallion iti selebrasion ti maika-118 a kasangay daydi Presidente Elpidio Quirino a naangay iti sango ti provincial capitol itay Nobiembre 17.

Inyukkor da agkabsat a Cory ken Eddie Quirino (appo daydi Pres. Pidiong)  ti medallion kada Gov. Deogracias Victor “DV” Savellano, Cong. Eric Singson, Vice Gov. Jerry Singson, Barangay Capt. Edgar Pajaro ken  Paulina Ramirez gapu iti di magatadan a panagserbi ken panangidauloda iti panagprogreso ti Ilocos Sur iti tay-ak a napilida.

Malaksid iti medallion, immawat pay dagiti awardees iti plake ti pammigbig (plaque of recognition).

Segun ken ni Nicomedez Ramirez,  presidente ti Elpidio Quirino Medalist Association ken nangidaulo iti selection committee, idi 1994 ti naudi a pannakaited ti  medallion kadagiti awardees ket saanen a naituloy manipud idi gapu iti ipupusay dagiti mangimaton itoy nga award giving body.

Nagyaman ni  Savellano iti pamilia Quirino iti pammadayaw nga impaayda kenkuana, kagiddan ti panangdayawna iti nagapuanan daydi Pres. Quirino para iti pagilian iti laksid ti mapapati a nakaro a graft and corruption, insurhensia  ken kontrobersia a naibato kenkuana.

“No sibibiag koma ni Apo Pidiong itoy a panawen, maysa koma a naisangsangayan a lider ken modelo kadagiti agtutubo a Filipino,” kinuna ti gobernador.#