5 panagsukisok, naggigiddan nga insayangkat police elements

SAN JUAN, Ilocos Sur – Tallo kadagiti lima a balbalay a naggigiddan a sinukisok dagiti nagtitipon nga elemento ti polis idi agsapa ti Pebrero 21 ti positibo iti mapapati a droga ken drug paraphernalia iti Barangay San Isidro ditoy nga ili.

Idi agarup 5:30 ti bigat ti nadakamat nga aldaw, naggigiddan nga insayangkat ti ISPAIDSOTG, PIB, ISPPSC ken polis-San Juan babaen ti  panangipangulo da PCI Sosimo Racho ken PCInsp. Faustino C. Bandao, hepe ken deputy chief ti PAIDSOTG, ken PSInsp. Pedro Alcausin Villalon, hepe ti polis ditoy nga ili, babaen ti direkta a superbision ni Provincial Director Police Senior Supt. Noel Baguitan Amoyen, DSC ken iti koordinasion ti PDEA ROI ti Search Warrant Nos.40, 41, 42, 43 ken 44 nga inyisio ni Judge Sixto D. Diompoc iti Branch 72, Narvacan, Ilocos Sur maikontra kada Ricky Romero, John John Lopez, Rolex Romero, Reynaldo Romero ken John Romero, residente amin iti Barangay San Isidro, San Juan, Ilocos Sur.

Nakakumpiska dagiti nagsukisok iti balay ni Ricky Romero iti maysa a transparent small heat sealed plastic sachet a naglaon iti mapapati a shabu nga agdagsen iti sumurok kumurang .1 gramo nga addaan iti balor a P1,180.00, cash money nga agdagup iti P87, 895.00 iti nadumaduma a denominasion ken $US35.

Nakakumpiska met dagiti nagsukisok ken ni Reynaldo Romero iti 20 pedaso a 2×2 a transparente a plastic sachet para iti repacking, 4 a disposable lighters, maysa a crumpled aluminum foil, maysa nga improvised buld totter ken 2 a transparent plastic sachet  a naglaon iti mapapati a shabu residue.

Iti panagsukisok iti balay ni John Romero, nakaala dagiti polis iti 5 nga improvised totter, aluminum foil ken 2 a disposable lighters.

Negatibo ti panagsukisok iti balay da John John Lopez ken Rolex Romero.

Sinaksian dagiti barangay officials nga indauluan ni Barangay Captain Juanito Rosales ken dagiti tanod ti naisayangkat a panagsukisok.

Naipan iti police station da Reynaldo Romero y Pascua, Ricky Romero, ken John Romero agraman dagiti nakumpiska kadakuada a mapapati a droga ken drug paraphernalia ket naisubmite dagitoy iti PNP Crime Laboratory Office, Bulag, Bantay, Ilocos Sur para iti pannakaamirisda.

Naiyendorso iti opisina ti provincial prosecutor, Vigan City, Ilocos Sur ti kaso a panaglabsing iti RA 6425 as amended by RA 9165 maikontra kadagiti tallo a suspek.#