5 suspek iti pammaltog, birbiroken dagiti polis

MAGSINGAL, Ilocos Sur -Naipila ti kaso a frustrated murder maikontra iti lima a suspek a mapapati a nanggandat iti biag ti maysa a mannalon sadiay Sitio Kinuang, Barangay Maas-asin  ditoy nga ili idi rabii ti Hulio 18.

Birbiroken ita dagiti polis da Calixto Ullero, Joseph Ullero, Ryan Cuaresma, Dennis Ullero ken Titong Ullero, agpapada a residente iti Sitio Baybayabas, Barangay Maas-asin, ditoy nga ili kalpasan nga innaganan ida ni Rodel Pascua Parbo, 23, baro, ken residente iti Sitio Kinuang, Barangay Maas-asin, ditoy nga ili, nga isuda ti nanggandat iti biagna iti nadakamat a petsa.

Ngem kinuna ni Police Senior Inspector Lucio Disierto, Sr., hepe ti polis ditoy, a saanen a nasapulan dagiti polis dagiti suspek idi napanda imbitaran dagitoy tapno mapagsaludsodanda mainaig iti pannakapaltog ni Parbo.

Mapapati a naglemmeng dagiti suspek kalpasan ti pammaltog.

Maipalagip nga idi agarup alas siete ti rabii ti Hulio 18, adda iti dalanda nga aggawid da Parbo ken ti kasinsinna a ni Melvin Ullero idi pinaltogan ida dagiti armado a tattao a nakatiruan ti akimbaba a pus-ong ti biktima.

Adda pay laeng ni Parbo a maag-agasan iti Metro Vigan Cooperative Hospital, Bantay, Ilocos Sur.

Kinuna ni Disierto a kitkitaenda ti balembales a motibo ti pammaltog.

Kabayatanna, naireport a nakasuanen iti Opisina ti Provincial Prosecutor, Vigan City, ti dua a suspek iti pannakapapatay  idi 2011 ni Barangay Kagawad Rodolfo Parbo y Castillo, 50, naasawaan ken residente iti Barangay Maas-asin, Magsingal.

Segun iti report, napilaan iti kaso a murder da Lerrypol Torda, taga-Maratudo, Magsingal ken ni Dennis Ullero, taga-Barangay Maas-asin, Magsingal gapu iti pannakapapatay ni Parbo iti sanguanan ti kapilia ni Iglesia ni Cristo sadiay Barangay San Lucas, Magsingal idi malem ti Oktubre 28, 2011.

Naaresto ti dua kalpasan a nagpirma iti apidabit ni Franklin U. Usana, maysa a saksi, ken ti asawa ti biktima a mapapati a nangikalam-itanda kadagiti suspek.#