Footer

5 tattao natay, pinullo ti nadangran, nakubong iti Bagyo Nina

BAGUIO CITY – Lima a tattao ti natay, pinullo dagiti nadangran ken 14 a minero ti nakubong iti mining tunnel iti ilalabas ni Bagyo Nina iti Amianan a Luzon a pakairamanan daytoy a siudad itay Septiembre 22.

Tallo ti natay ditoy a pakairamanan da Lolita Baroma, 76, ti anakna a ni Juan, residente iti Barangay Guisad Surong, ken ni Lielany Fetcha, 38, residente iti Barangay Dominican Extension kalpasan a nagaburanda iti reggaay idi kangitingit ti bagyo Nina.

Iti La Union, natay ni Rodolfo Villanueva, 27, residente iti Barangay Bucayab, Bauang, La Union idi nakaiggem iti nakulislisan a barut iti sanguanan ti NTC-Regional Office 1, a nakabase iti Barangay San Francisco, San Fernando City a puon ti nakakorienteanna.

Iti Ilocos Sur, nalmes ti maysa a mannalon a nabigbig a ni Cresencio Balay Joaquin, 53, residente ti Poblacion, Quirino kalpasan a ginuyod ti napegges nga agus ti Karayan Abra a sakup ti nasao a lugar.

Nasarakan ti bangkayna kalpasan ti sumagmamano nga oras manipud pannakaiyanudna.

Nadangran gapu iti reggaay iti Guisad Surong da Kayla Fetcha, Kenneth Fetcha, Rey Baglas, Jonathan Baroma, Mark Anthony Novestera, Janica Mae Novestera, Ruth Baroma, Magilyn Baroma Guisad, Donalyn Baroma Guisad, Michael Baroma Guisad, ken Emelita Baroma.

Karaman met a nadangran iti landslide iti Kesbeng, Poblacion, La Trinidad, Benguet da Catalina Paat, Gaspar Handaan, Monsor Pusawen, Aya Paat, Rico Yagui, ken Jessie Tolabis ken ni Virbek Magatin iti reggaay iti Ucab, Itogon, Benguet.

Kabayatanna, saan pay a naiyaon dagiti 14 a minero a nakubong iti Level 700 ti Antamok, Itogon ket amken dagiti mining officials a  bumasbassit ti tiansa nga adda nakalasat kaduada gapu iti panagtudotudona a nanglayus kadagiti tunnel ken iti kakurang iti ramit nga aramaten dagiti rescuers.

Nainaganan dagiti minero a  Gilbert Nattem, Garry Ganu, Rudy Boling Jr., Joel Bulga, Jeyson Himmayod, Rudy Himmayod, Jojo Himmayod, Juan Himmayod, Marvin Himmayod, Vincent Himmyod, Joseph Anayasan, Mario Annayasan, Gerry Monyobda,  ken Robert Buway.

Aganay a 100 a boluntario a minero manipud kadagiti kompania ti minas, polis ken Red Cross ti agtitinnulong iti pannakasalbar dagiti nakubong a minero.

Segun iti maysa a mining official, inabandona ti maysa a kompania ti minas dagiti nasao nga underground tunnels  idi 1990s ket naguardiaan ti dua a sumrekan kadagitoy.

Ngem mapapati a nangkali dagiti nakubong a minero iti nagnaanda a sumrek kadagiti tunnel.#