5 tattao, pakairamanan ti 3-tawenna nga ubing ti biktima ti naiwawa a bala

CAMP ELPIDIO QUIRINO, BULAG, Bantay, Ilocos Sur – Lima a tattao a pakairamanan ti maysa nga ubing ti nagbalin a biktima ti naiwawa a bala iti isasangbay ti baro a tawen.

Iti dimmanon a report iti provincial police office ditoy, natamaan iti naiwawa a bala idi agarup 12:50 ti bigat ti Enero 1 ni Aldred Valdez, y Marbel, 3, residente iti Barangay Calongbuyan, Candon City bayat a matmaturog iti indayon iti uneg ti balayda.

Segun iti  ina ni Valdez, nakangeg iti kanalbuong sa iti kellaat a panagsangit ti ubing. Idi mapan kinita ti ina ti anakna, naduktalanna laengen a daradara isu nga intarayna iti Candon City Hospital.

Nagsagrap ti biktima iti sugat iti makannigid a takiagna ken iti tianna manipud iti di ammo ti kalibrena a paltog.

Natamaan met iti naiwawa a bala ni Franklin Espejo, 36, ken residente iti Barangay Tamurong, Sta. Catalina idi agarup 12:20 ti bigat ti Enero 1.

Segun ken ni Joan, asawa ti biktima, agbuybuya ti asawana iti fireworks iti sanguanan ti balayda, kaduana dagiti annakna, idi tinamaan ti boksitna.

Naitaray ti biktima iti St. James Hospital iti Vigan City.

Nakarekobre dagiti polis iti slug a mapapati a nagtaud iti cal. 45.

Agbuybuya met ni Alvin Villegas y Lucero, 30, naasawaan ken residente iti Zone 4, Bantay, iti fireworks iti ruar ti balayna iti agarup 11:50 ti rabii ti Disiembre 31 idi napuntaan ti makannawan nga imana iti bala a naggapu iti di ammo a direksion ken no ania a kalibre.

Naitaray iti Metro Vigan Cooperative Hospital para iti pannakaagasna.

Sumagmamano a minutos, naitaray met ni Adrian Javier y Cardenas, 29, naasawaan ken residente iti San Julian Norte, Vigan City gapu iti sugatna gapuanan ti bala.

Naammuan iti inbestigasion dagiti polis a madama ti panagsindi ni Javier iti paputok iti balay ti gayyemna a ni Jeffrey Parilla idi natamaan iti naiwawa a bala ti makannawan a paset ti bagina.

Kabayatanna, naireport a natamaan  iti naiwawa a bala ti makannigid nga abaga ni Jocelyn Montero y Divina, 20, balasang, ken residente iti Barangay Dinalaoanbayat ti panagbuyana iti TV iti uneg ti tiendana idi agarup 10:35 ti rabii ti Disiembre 31.

Naitaray ti biktima iti Central Ilocos Sur District Hospital iti Paratong, Narvacan.

Impaima ti ina ti biktima ti maysa a buli manipud iti cal. 5.56 kadagiti nagresponde a polis.#