5-tawenna nga ubing, naaramat iti panagtakaw

SAN NICOLAS, Ilocos Norte – Ballaag kadagiti pagtagilakuan: uray ubing, aramatenen dagiti mannanakaw tapno makasikuatda.

Segun iti report manipud iti Bombo Radyo Laoag, ubing nga agtawen iti lima ti inaramat dagiti mannanakaw a nangsikuat iti bag ni Loida Villena, akinkukua iti pagtagilakuan ken residente ditoy nga ili.

Natiliw da Marilyn de Leon ken Emma Paday, agnaed iti Barangay Bulusan, San Carlos, Pangasinan, mapapati a kameng ti Salisi Gang, ngem nakataray ti ubing ken sabali pay a kaduada.

Segun iti panagimbestiga dagiti polis, nagpammarang da de Leon ken Paday a kustomer ket bayat ti panangasikaso ni Villena ida, linibas nga intaray ti ubing ti bag ti negosiante a naglaon iti P35,000, passbooks ken checking account booklet.

Nupay kasta, narekobre dagiti nagresponde a polis ti bag a naipalladaw iti maysa a kanal iti tiendaan.#