5 tawenna nga ubing, napaltogan ti kabsatna

BANTAY, Ilocos Sur – Inabalbalay ti maysa a Grade III pupil ti airgun ti amana ket aksidente a napaltoganna ti inaudi a kabsatna.
Intawag ti maysa a personnel ti Gabriela Silang General Hospital ti aksidente a pannakapaltog ni Jessie Cabrera, Jr. y Managuelod, 5, agbasbasa iti kindergarten, a napasamak iti Barangay Guimod, Bantay, Ilocos Sur idi agarup 7:55 p.m. ti Disiembre 25.

Nainaganan ti nakapaltog kenkuana a ni Darwin Cabrera, 12, inauna a kabsat ni Jessie, Jr.

Segun ken ni John Lloyd Lopez y Pataray, 12, agay-ay-ayamda kada Jessie, Jr. iti uneg ti kalapaw idinto nga ay-ay-ayamen met ni Darwin ti air gun ti amada idi aksidente a gimluong daytoy ket napuntaan ti makannawan nga lansalansa ti biktima.

Naitaray ti biktima iti GSGH ngem rimmuar met laeng kalpasan ti pannakaagasna.

Boluntario met nga insuko ni Jessie Cabrera, Sr., ti air gun kadagiti nagresponde a polis.

Kabayatanna, nakalasaten iti peggad ti maysa a polis a babai iti Ilocos Training Regional and Medical Center, Parian, San Fernando City a nakaitarayanna kalpasan a mapapati nga aksidente a napaltoganna ti bagina iti uneg ti baraksda idi agsapa ti Disiembre 31.

Nupay kasta, maob-obserba pay laeng ti kasasaad ni PO1 Rhea Mariñas y Medriano, 26, awanan asawa, residente iti Barangay San Eugenio, Aringay, La Union ken PNP member a naka-assign iti 1st Manuever Platoon Detachment, ISPPSC a nakabase sadiay Barangay Uso, Suyo, Ilocos Sur.

Kanaig daytoy, kas kiniddaw ti kapolisan ti Suyo, Ilocos Sur, nangisayangkat ti Crime Laboratory Filed Office, Candon City iti crime scene processing ket narekobreda ti maysa a cal. 9 mm Glock 17 pistol nga addaan SN PNP 38147, 13 bala para cal. 9 mm, maysa a magasin para cal. 9 mm, maysa nga FCC para cal. 9 mm ken maysa a buli manipud iti cal. 9 mm.

Naipaamiris dagitoy iti crime laboratory.

Naireport iti police station ti Suyo ti aksidente a pannakapaltog ni Marinas iti bagina babaen ken ni PO1 Regidor Pascua, sabali pay a polis a naka-assigned iti 1st Manuever Platoon Company, ISPPSC.

Segun ken ni Pascua, kalpasan ti panaglaba ni Marinas, simrek iti baraksda a babbai ket sumagmamano a minutos, nakangeg laengen dagiti kaduana iti kanalbuong ken panagpaarayatna.

Nakitada laengen ni Marinas a nakailad iti iddana nga adda sugatna iti makannigid a barukongna. Adda iti abay ti biktima ti cal. 9 mm Glock 17 pistol a naiyisio kenkuana.#