5 trabahador, natiliw iti akto nga agtaktakaw

STA. MARIA, Ilocos Sur – Lima a lallaki ti nasukalan nga agtaktakaw iti plywood iti bodega ti maysa a pasdek negosio idi malem ti Abril 18 ditoy.

Nakasuan iti panagtakaw iti assistant provincial prosecutor’s office iti Narvacan, Ilocos Sur dagiti suspek nga agpapada amin a trabahador ti New La Union Plywoods Trading Center a nainaganan Ruben Laoayan y Ette, 37, naasawaan, drayber; ken Mark Flores y Balatero, 23, naasawaan, agpada a residente iti Barangay Acao, Bauang, La Union; Roderick Cariaga y Ramirez, 26, naasawaan, residente iti Poro Point, Barangay San Agustin, San Fernando City, La Union; Wilmer Alaba y Emperador, 26, baro, residente met laeng iti Poro Point, Barangay San Agustin, San Fernando City; ken Jessie Dava y Ramos, 28, baro, checker ti Cleofel Enterprises, ken residente iti Barangay Tangaoan, Sta. Maria, Ilocos Sur.

Naammuan iti report a nasukalan ni Engr. Anacleto Rabanal y Calibuso, 48, naasawaan ken akinkukua iti Cleofel Enterprieses a masarakan iti Barangay Danuman East, Sta. Maria, Ilocos Sur dagiti suspek nga agikarkarga iti lugan ti tallupulo ket pito a plywood a nagduduma ti rukodda.

Natukay ti suspetsa ti inhiniero agsipud ta awan met ti pinirmaanna a mangipalubos iti pannakaikarga dagiti nasao a plywood.

Kabayatanna, napilaan metten iti kaso a theft ti dua a babbai gapu iti panangsipdutda iti petaka ti maysa a kustomer iti maysa a paglakuan idi napan a lawas.

Nakasuan iti Candon City Prosecutor’s Office da Rezalyn Guiriva y Boncodin ken Rosemarie Villanueva y Ventura kalpasan a natiliwda a nagsipdut iti bargain center a masarakan iti Barangay San Isidro, Candon City idi Abril 17.

Iti panagimbestiga dagiti polis, madama ti panag-shopping ni Julie Ann Gallarin y Obillo, 28, naasawaan, ken residente iti Barangay Caterman, Candon City idi linaslas dagiti suspek ti bagna sada innala ti petakana.

Nasiputan ni Julie Margallo y Costales, 21, naasawaan, residente iti Poblacion, Sta. Maria ti panagsipdut ket nagpatulongda iti polis a nagtungpal iti pannakatiliw dagiti suspek.

Segun iti saksi, biktima met dagiti suspek a nangsipdut iti pouch ti selponna a naglaon iti P2,800.00.#