50 tattao, nasabidongan iti mass wedding

BAUANG, La Union – Nasurok a 50 a tattao, pakairamanan dagiti nagkasar, ti nasabidongan iti naangay a mass wedding iti Barangay Upper San Agustin ditoy nga ili idi Mayo 1.

Iti report manipud iti Bombo Radyo La Union, mapapati a nasabidongan dagiti dimmar-ay iti nasao a pakasar iti naipasango a taraon.

Kanaig daytoy, imbilin ni Mayor Eulogio Martin de Guzman III ti pannakaisayangkat iti inbestigasion mainaig iti nasao a food poisoning.

Mapattapatta a nabangles dagiti sumagmamano a putahe a naisagana gapu iti kinabara ti panawen.

Naammuan a nakarikna dagiti biktima iti pannakaulaw, panagbakuar, panagibleng ken panagsakit iti tianda kalpasan ti pannanganda.

Sangapulo ket walo a pares ti nagkasar iti mass wedding kas paset ti selebrasion ti piesto ti ili ditoy.#