50 tawen kas mannurat

Nagdaras ti panagtayab ti panawen! Kasla idi kalman laeng ngem iti pannakadanon ti Tawid News ti maika-11 nga anibersariona, adda met nasurok gayamen a limapulo a tawen nga agsursuratak. Iti dayta a panawen, saan a panangbagkat iti bukod a bangko, nabaked metten ti kontribusionko, saan laeng iti literatura no di pay iti panagiwarnakan.

Kinapudnona, 1961 idi nangrugiak nga agsurat. Addaak idi iti umuna a tukad ti kinamaestro iti Divine Word College ditoy Vigan (Colegio de la Inmaculada Concepcion pay la ti awagna idi. Kolehio daytoy nga imatonan dagiti SVD fathers) idi maipablaak iti Bannawag ti umuna a saritak a napauluan iti “Ti Langit a Kaimudinganna”. Naglaok ti ragsakko (ken kigtotko ta diak ninamnama ken pasindayagko!) idi maipablaak iti Bannawag ti damo a putarko. Ngem anian a pannakadismayak idi basaenmi ti saritak. Ganggannaet metten ti sarita a nabasak. Pirmi a nabalbaliwan! Diay la titulona ti orihinal.

Ngem saan a daytoy ti nangpalupoy iti riknak. Pinagbalinko ketdi a karit tapno asaek ti plumak.

Dakkel a pagyamanak ta iti daydi a panawen, sakbay ti panagkolehiok, naggianak  kadaydi Manang Pacing (Pacita Espejo-Cabatu) a kasinsinmi iti Sta. Maria kas kadkaduada ken panagikarok metten iti panangpabasada kaniak. Mangisursuroda nga agassawa iti elementaria iti Sta. Maria.

Masansan idi a paayabannak ni Manang Naty (Natividad Foronda), inaudian a kabsat daydi Dr. Marcelino Foronda, Jr. tapno kadkaduaek iti balayda no agmaymaysa.  Balasang pay idi ni Manang Naty, ingget lapsat a babai.

Iti biblioteka ni Dr. Foronda ti nakasarakak ken nagbasbasaak kadagiti nadumaduma a libro, nangruna dagiti gapuanan dagiti malalaki a mannurat iti sangalubongan. Agmalmalem no kua nga agbasaak kadagiti libro iti biblioteka ta saan kano a kayat ni Dr. Foronda a mairuar dagiti librona.

Dagitoy a libro ti nangusat iti dalanko nga agbalin a mannurat.

Iti panagbalinko a mannurat, namarisan ti biagko kadagiti nadumaduma a padas, pilosopia, ken prinsipio ket dagitoy ti nangmuli ken nangsukog iti kinataok, nangruna iti kinamannuratko. Dagiti adal a napidut, naagsep, ken naimutektekak kadagiti nababaked a sarita a nabasbasak ti maregmeg ti balitok a nagbalin nga instrumentok iti panagputarko kadagiti sarita agingga iti agdama.

Nasurok a limapulo a tawen! Kadagiti dadduma, nabayagen a nagsardengda tapno nanamenda metten ti sam-it ken bunga ti kinamannuratda. Ngem saan pay kaniak. Agingga iti nabagas pay dagiti idea nga ikur-itko, agsuratak latta tapno ipadanonko kadagiti agbasbasa dagiti ilgat ti kinapudno iti biag, barbareng makatulong ken mangted iti gabay iti panagdaliasatda met iti dana nga agturong iti kaikarianda.#