5,000 a mannalon, nawarasan iti libre a ganagan

CABUGAO, Ilocos Sur – Umabot iti P2.5 milion ti pategna a ganagan ti naipaay kadagiti mannalon ditoy idi Nobiembre 8 a naggapu iti R.A. 7171 municipal share ti ili.

Lima a ribu a mannalon ti nawarasan iti sagsaysa a sako ti ammonium phosphate kabayatan ti simple a seremonia a naangay iti Cabugao Culture and Sports Complex a dinar-ayan da Governor Luis “Chavit” Singson ken Vice Governor Deogracias Victor Savellano.

Iti maysa nga interbio ken ni Mayor Edgardo “Ediboi” Cobangbang Jr., kinunana a daytoy ti umuna a programana babaen ti ID system nga inaramidna para kadagiti mannalon.

“Immuna, pina-identifyko dagiti lehitimo a mannalon iti tunggal barangay babaen ti municipal agriculture office ken iti pannakitinnulong dagiti farmer leaders tapno malapdan ti pananggundaway dagiti manglimlimo a mannalon,” kinuna ni Cobangbang.

Ipakita laeng ti mannalon ti IDna tapno maka-avail iti tunggal proyekto a maited para kadakuada tapno naan-annayas ken dagiti talaga a mannalon ti mabenepisiaran, innayon ti mayor.

Kinuna ni Cobangbang a naggapu kadagiti mannalon dagitoy a pondo isu a rumbeng laeng a maipaay met laeng daytoy para iti pagsayaatanda.

Impadamag pay ti ama ti ili a naaprobaran metten  iti konseho munisipal ti P7.1 milion a pondo a maipaay kadagiti mannalon ti tabako itoy a panagtatabako. Agpaayto daytoy a pondo a pagpuonan dagiti mannalon tapno masigurado ti nangato a kalidad ti binulong dagiti mulada a tabako.

Kabayatanna, kinuna ni  Singson a napintas a pagtuladan  dagiti dadduma nga ili ti inaramid ti LGU ti Cabugao.

“Daytoy ti kapintasan a proyekto para kadagiti mannalon ta itoy a proyekto, mariknada nga isuda ti prioridad,” kinuna ti gobernador.

Sinaludaran pay ni Savellano daytoy nga addang ti lokal a gobierno ti Cabugao ta kaaduan nga umili ti mabenepisiaran.

“Daytoy ti mangipakita nga adda maymaysa a direksion ti LGU ken ti probinsia no maipanggep iti proyekto ti pagpapatangan,” innayon ni Savellano.#