54 paltog, nakumpiska: report ti Abra PPO

BANGUED, Abra – Agdagup iti 54 dagiti nadumaduma nga armas a narekobre ken nakumpiskar ti kapolisan ditoy probinsia manipud Enero agingga iti agtapus ti bulan ti Hunio, daytoy ti report manipud iti Provincial Police Office itay nabiit.

Segun ken ni PSI Angelito Dangli, PPO Information Officer, ad-adu ti natiliw ken nakumpiskarda a paltog iti daytoy a tawen no maidilig idi napan a tawen a nakatiliwda laeng iti 29.

Kinuna ni Dangli a maipan dagiti nasao a paltog iti crime laboratory ti PNP Regional Command iti Camp Dangwa, La Trinidad, Benguet para iti ballistic examination.

Mausar ti resulta ti nasao a ballistic examination para iti cross matching dagiti kapsula ken paltog a naaramat kadagiti kallabes a krimen iti probinsia a makatulong iti pannakasolbar dagiti kaso.#