6 drug pushers, natnag iti nagsina a buy bust operations

CANDON CITY – Saanen nga iti kalkalsada ti pakailakuan dagiti droga no di payen kadagiti hotel, daytoy ti limtuad iti panagisayangkat dagiti polis iti nagsaruno a buy bust operations iti Sta. Lucia ken ditoy siudad idi Hunio 12 ken 13.

Idi Hunio 12, inwayat dagiti nagtitipon nga operatiba ti Sta. Lucia PNP nga indauluan ni Police Chief Inspector Jason Tejero Nadarisay, OIC, PDEA-ISSET nga indauluan ni Regional Director Adrian G Alvarino, Director III, CESE ken 2nd Maneuver Company, ISPPSC, ti buy bust operation iti Barangay Sabuanan, Sta. Lucia, partikular iti Janro Traveller’s Inn Room 103 maikontra iti uppat a mapapati a drug pusher a nagtungpal iti pannakaaresto dagitoy.

Tiniliw dagiti operatiba da Albert Matias y Contaoi, 40, baro; Donna Buebos y Mansanillo, 25, balasang, agpada a residente iti Barangay Centro 8, Claveria Cagayan;  Edgar Dela Cruz Sablan, 57, naasawaan, residente iti  Barangay Ammubuan, Ballesteros Cagayan’ ken  Renalito Puzon y Rebibis, 38, naasawaan, ken residente iti  Barangay Rizal, Tagudin, Ilocos Sur.

Nakakumpiska dagiti operatiba iti ikut dagiti suspek iti medium heat sealed transparent plastic sachet a nagkarga iti white crystalline substance a mapapati a shabu; 2 big heat plastic sachet a nagkarga iti mapapati a shabu; 2 babassit nga improvised glass tooter; 2  medium improvised glass tooter; maysa paris nga stainless clinical scissor; 2 digital weighing scale; maysa a bassit a transparent cellophane a naglaon iti sumagmamano a  plastic sachets, 4 distorted lights iti nadumaduma a kolor; 2 dadakkel a rolio ti aluminum foil, BDO cash deposit slip a nainagan ken ni Catherine D. Co; 18 Pera Padala receipts, 2 mobile phone Nokia ken SKK; 2 a sag-P1,000.00 (SN XN367762 ken BO8147) a naaramat a buy bust money, ken maysa a revolver  Armscor 202 Cal.38 SPLna addaan serial number 1003986 a nagkarga iti 5 a bala; homemade pistol Model 213 cal 9mm nga addaan serial number 318978 ken maysa a magazine ken 6 a bala.

Inkuyog dagiti operatiba ti PDEA dagiti nasamsam nga illegal a droga ken paraphernalia iti San Fernando City, La Union idinto a naipan dagiti paltog iti Crime Laboratory, Police Regional Office 1 para iti umisu a disposision.

Na-impound pay ti dua a kotse dagiti suspek a pakaibilangan ti berde a Nissan Sentra ken brown Ford Escapade bayat a mayuray ti beripikasion manipud iti Land Transportation Office, Candon City.

Kabayatanna, iti maysa met laeng nga otel ti nakapalab-ogan  ti dua a maatap a drug pusher babaen ti buy bust operation nga insayangkat dagiti nagtitipon nga operatiba ti PDEA-ISSET nga indauluan ni Agent Darnell Bacale, Candon City Police Station nga indauluan ni Inspector Ernesto de Bien, Jr. ken Sta. Lucia Police Station nga indauluan ni Chief Inspector Jayson Nadarisay.

Tiniliw dagiti operatiba da Cristina Caringal y Bulusan, 30, awanan asawa, ken residente iti Barangay Santo Rosario, Aringay, La Union, ken ti kaduana a nabigbig a maysa a Christopher Smith y Bulusan, 18, baro,  ken residente of Suyo, Luna, La Union kalpasan a nagpositibo ti operasion maikontra kadakuada.

Karaman ni Caringal iti PDEA Illegal Drug Target List.

Nakumpiska iti ikut dagiti suspek ti 7 a big heat sealed transparent plastic sachet a naglaon iti mapapati a shabu; maysa a medium plastic box a naglaon iti awan kargana nga elongated plastic sachets; maysa a weighing scale; 2 a lighter; 4 nga improvised tooter; maysa a paris ti getteng; ken P1,000.00 a naaramat a marked money.

Naipan dagiti suspek ken dagiti nakumpiska kadakuada iti PDEA-RO1, San Fernando City, La Union para iti umisu a disposision ken dokumentasion.#