Footer

6 dump trucks, naiyawat iti gobierno ti siudad ti Vigan

VIGAN CITY – Innem a  dump truck ti naited iti gobierno ti siudad ditoy tapno adda aramaten dagiti resipiente a pagbunag iti basura iti lugarda.

Kinuna ni Mayor Eva Marie S. Medina a maragsakan unay gapu kadagiti dump truck nga inted ni Gov. Ryan Singson idinto nga impalgakna a nayon dagitoy kadagiti immun-una a lugan nga  inted met laeng ni Singson para iti Vigan City idi diputado pay iti umuna a distrito ti probinsia.

Segun ken ni Medina, idi damo naituding a maited dagiti dump trucks para iti cluster barangays ti siudad ngem idi minitingna dagiti barangay captains, rimmuar ti posible a panagpipinnatudon dagitoy no asino ti agpatarimaan iti dump truck no madadaelan

Naammuan a dua a dump truck ti immuna a simmangpet iti siudad sa sabali manen nga uppat a naited iti sango ti convention center.

Kabayatanna, kinuna ni Gov. Singson a multipurpose dagiti naited a truck, mabalin a para basura wenno pagkarga kadagiti produkto a maibiahe.

Segun iti gobernador, naggapu iti PDAF ti naigatang kadagiti dump truck.

Kinunana a saan laeng a Vigan ti nakaitedan dagiti dump truck no di pay nadumaduma nga ili iti Ilocos Sur.

Innayonna nga ikonsentreytna ti farming iti maikadua a distrito ket ti truck ti makitkitana a dakkel a makatulong kadagiti agindeg sadiay a pangibiahe kadagiti produktoda.

Kinuna ni Medina a nagnumuananda iti city government ken kalpasan ti panangiyumanda ken ni Gov. Singson a maited dagiti naudi a simmangpet a dump trucks kadagiti barangay a kaadduan ti basurada a pakaibilangan ti Barangay 1, 3, 4, 8, 9 ken Barangay Tamag.

Madakamat a yuyeng dagiti turista ti Barangay 1; masarakan dagiti pasdek negosio iti Barangay 3; dakkel ti sakup ken populasion ti Barangay 4 ken Barangay 9; masarakan ti tiendaan ken dagiti pasdek negosio iti Barangay 8; ken ayan dagiti dormitorio dagiti estudiante, ti University of Northern Philippines ken ti Gabriela Silang General Hospital ti Barangay Tamag.

Kinuna ti mayora a kaadduan ti basura dagitoy a barangay ket kasapulanda ti dump truck a pagkargada kadagiti basura.

Kinuna ni Medina a nupay nairanta a pagbunag iti basura dagiti dump truck, mabalin pay a utility vehicle a maaramat iti pannakaibiahe dagiti produkto ken tagilako dagiti agindeg

Indagadag ni Medina kadagiti barangay captains a resipiente dagiti dump truck nga iti daytoy a panagbabadiet, ilak-aman dagitoy ti para gasolina ken maintenance ti lugan ken bayad iti drayber.

Inyunay-unay ti mayora nga aywanan dagiti resipiente dagiti dump truck tapno agbayagda , kasta met iti panagaramidda iti pagannurotan no bilang adda sabali a barangay a mangsublat iti lugan.#