6 lalaki, nadetene gapu iti mapapati nga illegal a napukan a kayo

NAGBUKEL, Ilocos Sur – Innem a lallaki a pakairamanan ti mapapati nga akinkukua ken gimmatang iti mapapati nga illegal a napukan a kayo ti nadetene ken iti police station gapu ta awan ti maipakitada a dokumento ti pannakaibiahena.

Segun iti report, nagturong dagiti polis, kaduada ti bise mayor ken sumagmamano a konsehal iti Barangay Cosocos ditoy met laeng nga ili gapu ta nakaawatda iti impormasion nga adda napukan a kayo ti molave a naikarga iti maysa nga Isuzu Elf nga addaan plaka a WFR-608 ngem nakapanawen ti lugan.

Nangisayangkat ti polis iti pursuit operation ket nakamakamda ti lugan iti Barangay Samaritan, Narvacan.

Dagus a sinukimat dagiti polis nga indauluan ni P1 Heraldo Agbunad Antonio ti Isuzu Elf ket positibo a nagkarga kadagiti naputed a kayo.

Naimbitaran iti police station ditoy da Winster Galinato y Dasargo, 29, naasawaan, drayber, residente iti Barangay Cabaroan, Sta. Catalina, Ilocos Sur; Felix Racoma y Rualizo, 34, naasawaan, residente iti Nagtupacan, San Vicente; Jangjang Nicanor y Rodillas, 30, naasawaan; Mario Rabe y Roqueta, 58, naasawaan; Ricky Navarro y Rabago, 25. baro, agpapada a residente iti Barangay Lubong, San Vicente; Pepito Zamora y Talaga, 36, residente iti Barangay Cadacad, Narvacan ken ni Rey Molina y Vecre, 49, naasawaan, mapapati nga akinkukua ken gimmatang kadagiti kayo, ken residente iti Barangay Nagtupacan, San Vicente, Ilocos Sur gapu ta awan ti maipakitada a dokumento manipud iti DENR mainaig iti pannakaibiahe dagiti kayo.

Iti pannakaisurat daytoy, naipaima idi Marso 23 dagiti natiliw agraman dagiti 78 a pedaso ti kayo a molave iti forest protection officer ti DENR iti San Ildefonso, Ilocos Sur.#