6 lalaki, napakatan iti paraffin test mainaig shooting incident

SANTA, Ilocos Sur – Innem a lallaki ti inawis ti kapolisan tapno lawlawaganda ti pannakainbolbarda iti pammaltog a napasamak iti Barangay Nagpanaoan ditoy nga ili idi rabii ti Mayo 2.

Napaltogan ni Alwin Dadoy y Astrologio, 24, naasawaan, ken residente iti Barangay Nagpanaoan idi agarup 11:15 ti rabii ti nadakamat a petsa gapu iti riribuk a mapapati a pinarnuay ti grupo dagiti suspek.

Agpapaimbag ti biktima iti Gabriela Silang General Hospital a nakaitarayanna kalpasan ti pannakapaltogna.

Iti inisial nga inbestigasion dagiti polis, idi agarup 10:30 ti rabii ti nadakamat a petsa, pinasardeng ni Jayson Billones, barangay kagawad, ti motorsiklo a minaneho ni Dadoy gapu ta napaspas ti panagtarayna.  Segun iti report, adda iti inpluensia ti arak ni Dadoy iti dayta a rabii.

Nagresulta daytoy iti nabara a panagsinnungbat ti kagawad ken ni Dadoy ken ti panangkarit ti naud-udi iti kagawad.

Naggawid ni Dadoy iti Barangay Raois ngem idi alas 11:00 iti dayta met laeng a rabii, nagsubli iti Barangay Nagpanaoan, kakuyogna dagiti kalugaranna a da Bernardo Balgos Jr. y Ayunon, Mac Darius Valdez, GR Valdez y Pacis, ken Jordan Abero y Ayco.

Mapapati a nagprobokar ti grupo ngem pinagtalna ida dagiti opisial.

Ngem kellaat nga adda nagpaputok ket natiruan ni Astrologio.

Segun iti maysa a saksi, nakitana ti tallo a lallaki a nabigbig idi agangay a da Jowie Abero, Jaynard Abero and Limmuel Lucas, agpapada a residente iti Brgy Raois, Vigan City, a dagus a pimmanaw a nakasakay iti motorsiklo kalpasan ti putok.

Mapapati a maysa kadagitoy ti nakaiggem iti paltog.

Iti panagimbestiga ti polis, nakarekobreda iti maysa nga slug manipud iti di pay ammo ti kalibrena a paltog iti barangay road iti asideg ti akin-abagatan a paset ti balay ti asawa ti biktima.

Naipatuloden ti slug iti crime laboratory para iti ballistics examination.

Segun iti polis, naipababaen metten iti medical examination da Bernardo Balgos Jr. y Ayunon, Mac Darius Valdez, GR Valdez y Pacis ken Jordan Abero y Ayco ken addadan iti kustodia ti Santa Police Station.

Naipaamiris metten ti ima da Jowie Abero y Ato, Jainard Abero y Ato, Limmuel Lucas y Valeria, Richard Querubin y Imburnal, Jerry Armandico y Verzosa, Clemente Raqueño y Buenecille Jr., para iti paraffin test idi Mayo 3 sadiay Provincial Crime Laboratory Office, Bantay, Ilocos Sur, tapno maammuan no nagpaputokda iti paltog.#