6 lallaki, natiliw nga agsusugal

CANDON CITY – Sabali manen a grupo dagiti lallaki ti tiniliw dagiti polisĀ  nga agsusugal iti Barangay San Agustin idi malem ti Enero 17 kas paset ti kampaniana maikontra iti sugal ditoy siudad.

Apaman a nakaawat dagiti polis ditoy iti mensahe nga adda agsusugal iti nadakamat a barangay, dinagdagusda ti nagresponde babaen ti panangidaulo ni Police Inspector Cipriano Macaraeg ket akto a natiliwanda dagiti sumagmamano a lallaki nga agdadado.

Nabigbig dagiti agsusugal a da Eric Rosales y Villanueva, 27, baro; Manuel Baricawa y Naungayan, 42, naasawaan; Rodolfo Villanueva y Gabor, 68, naasawaan; Francisco Galacio y Rinopa, 53, naasawaan; Elmer Villanueva y Galacio, 27, naasawaan; agpapada a residente iti Barangay San Agustin; ken Danilo Gacusan y Gaoat, 39, naasawaan, residente iti Barangay Bagani Ubbog.

Nakumpiska kadagiti agsusugal dagiti pusta ng agdagup amin iti P2,270, dua a dado, ken kalub ti banga.

Iti pannakaisurat daytoy, naipaiman iti city prosecutor ti kaso a panaglabsing iti PD 1602 maikontra kadagiti natiliw.

Iti umuna a lawas daytoy a bulan, tallo nga agpaspasada iti traysikel ti tiniliw dagiti polis ditoy gapu iti panagsusugalda iti nagsulian ti San Juan Street ken Abaya Street.

Malaksid a kinumpiska dagiti polis ti bet money a P180 iti nadumaduma a dominasion ken dua a coin a binting nga inaramatda a pagbuntayog, napilaan pay dagiti tallo iti kaso a panaglabsing iti PD 1602.#