6 lugan nainbolbar iti nagsina nga aksidente, 5 nasugsugatan

BANTAY, Ilocos Sur – Innem a luglugan ti nainbolbar iti nagsina nga aksidente a napasamak iti national highway a sakup ti Barangay Bulag ditoy nga ili awan pay dua oras ti baetda idi aldaw ti Oktubre 2.

Tallo a security guard ti nasugatan iti aksidente a napasamak idi agarup alas 9:50 ti bigat ti nadakamat nga aldaw idinto a dua ti nasugatan iti simmaruno nga aksidente a napasamak iti dayta met la a highway a sakup ti isu met la a barangay agarup alas 11:10 iti dayta met la nga aldaw.

Iti immuna nga aksidente, naireport a nasugatan da Reynold Narra y Marso, 42, naasawaan; Francisco Del Mundo y Udillo, 30, naasawaan, agpada a residente iti Brgy. Quidem, San juan, La Union ken John Casalloy Bautista, 22, baro, ken residente iti Brgy. Nanguneg West, Narvacan, Ilocos Sur, ken agpapada amin a security guard Gallantry Security Agency ket naitarayda iti naitarayda iti Metro Vigan Cooperative Hospital.

Nupay saan a naan-ano dagiti drayber, nagsagrap iti pannakadadael dagiti nainbolbar a lugan a pakaibilangan ti Isuzu jitney a minaneho ni Johnny Sambajon y Dumlao, 36, naasawaan, ken  residente iti Brgy. Labut, Santa, Ilocos Sur; ti Isuzu delivery van a minaneho ni Rodel Palacpac y Calibuso, 32, naasawaan, ken residente iti Brgy. Puspus, Bantay, Ilocos Sur; ti armored van a minaneho ni Eric Figares y Cabatu, 40, ken residente iti Rugsuanan, Vigan City; ken sabali pay nga armored van a nairehistro iti babaen ti   Safeguard Armor Sec. Corporation, a minaneho ni  Edison Regucera y Pablico, 37, naasawaan, ken residente iti Brgy. San Ramon, Magsingal, Ilocos Sur.

Iti panagimbestiga dagiti polis, agdaldaliasat nga agpaamianan iti national highway a sakup ti Barangay Bulag ti armored van a minaneho ni Figares ket nagmenor daytoy gapu iti isaysayangkat dagiti personnel ti Highway Patrol Group a checkpoint ngem iti dayta met a kanito, nag-obertek ti sabali nga armored van a minaneho ni Regucera ket nasapgidna ti sumungad nga Isuzu jitney ken ti armored van ken nadungparna ti agpaabagatan a delivery van sana dinungpar ti puon ti nyog iti akinkannigid nga abaga ti kalsada.

Nadadael ti kannigid a paset ti akinlikud a bumper ti armored van a minaneho ni Figares, nakaro ti pannakadadael ti makannigid a paset ti bagi ti jitney, nabuong ti windshield ti delivery van idinto a kakaruan ti dadael ti armored van a minaneho ni Regucera.

Kinuna ni Regucera a nagdadael ti brake ti luganna a nakaigapuan iti aksidente.

Iti maikadua nga aksidente, nasugatan da Jovito Vallesta Dela Cruz, Jr., 24, naasawaan, ken residente iti Barangay Boquig, Bantay ken ni Manuel Yapyapan, Jr., y Ramirez, 47, naasawaan,  community relations officer ti Luzon Hydro Corporation, ken residente iti 384 Upper San Vicente, Baguio City.

Naitaray ni Vallesta iti Gabriela Silang General Hospital, Vigan City, idinto nga iti Metro Vigan Cooperative Hospital ni Yapyapan a nablo ti makannawan nga abagana.

Naammuan iti inisial a panagimbestiga dagiti polis nga agpada nga agpaamianan ti Toyota Hi Lux a minaneho ni Marcos Estillore Jr. y Andrada, 40, naasawaan, ken residente iti Anao-ao, Alilem, Ilocos Sur ken ti Isuzu close van a minaneho ni Alakasam Nerona y Nugal, 24, naasawaan, ken residente iti Barangay Barrientos, Luna, La Union ket idi makadanonda iti nakapasamakan ti aksidente, nagmenor ti Toyota Hi Lux agsipud ta matuparna iti sanguanan ti ice cream vendor a nakalugan iti bisikleta ngem kellaat a dinungpar ti Isuzu van ti kutit ti Hi Lux a nagresulta iti pannakadungso daytoy iti aglaklako iti ice cream.

Saan a naan-ano dagiti drayber ngem nagsagrap iti nakaro a dadael dagiti luganda.#