Footer

6 mangngalap, natiliw gapu iti panagkalapda iti fish sanctuary

CANDON CITY –  Innem a mangngalap ti inaresto dagiti polis itay nabiit kalpasan a natiliwanda a nagkalap iti fish sanctuary iti sitio Quimmarayan, Caterman ditoy a siudad.

Nainaganan dagiti natiliw a da Jomel Raiz, 33;  Bong Molina, 43; Jeffrey Pascua, 24; Agapito Pascua, 51; Edmon Caniero, 41; ken Benito del Rosario, 43, agpapada nga agnaed iti Tamurong Primero ditoy.

Segun iti blotter ti polis, nakaawatda iti report manipud ken ni Kapitan ti Caterman Jimmy Gagarin nga adda dagiti nasiputanna nga agkalkalap iti lugar a naituding a santuario dagiti lames ditoy a siudad.

Dagus a nagresponde dagiti polis babaen ti panangidualo ni Police Inspector Providencio Calibuso, deputy chief of police, ket natiliwan dagiti suspetsa nga agkalkalap iti protektado a santuario dagiti lames babaen ti panagaramatda iti triplets nga iket.

Iti daytoy a wagas ti panagkalap, saan a makalasat uray dagiti babassit nga ikan.

Naipan iti estasion ti polis dagiti mangngalap agraman dagiti inaramatda nga iket.

Iti interbio kadakuada, inannugot dagiti mangngalap nga immapalda a napan nagkalap iti fish sanctuary agsipud ta adda dagiti masipsiputanda a tagasabali nga ili nga agkalkalap iti nasao a lugar ngem saanda met a matiltiliw.

Inkalintegan pay dagiti suspetsa a gapu iti kinakisang ti makalapanda, pinadasda ti nagkalap iti nasao a protektado a lugar tapno adda pangbiagda kadagiti pamiliada.

Napalubosan met laeng dagiti mangngalap kalpasan a nagmultada gapu iti panagsalungasingda iti paglintegan.

Inkari dagiti mangngalap a  nakasaganada a makikaysa kadagiti mangbanbantay iti fish sanctuary kontra kadagiti agar-aramat iti compressor nga aggapu kadagiti kabangibang nga ili.#