6 suspek iti 3 pammapatay, nakasuan

CAOAYAN, Ilocos Sur – Innem a suspek iti nagsisina a pammapatay a pakaibilangan ti agama ditoy nga ili ti napilaan iti kaso iti provincia prosecutor’s office itay nabiit.

Napilaan iti kaso a murder da Enrico Quarte y Quinajon, Sr., 59, naasawaan, laborer, ken ti anakna a ni Erwin Quarte y Balala, 21, baro, agpada a residente iti Barangay Don Dimas Querubin, mainaig iti pannakapapatay ni Antonio Avera y Llanes, 50, naasawaan, retirado a PNP member ken residente iti Barangay Don Dimas Querubin, iti provincial road ti Barangay Don Lorenzo Querubin idi bigat ti Oktubre 20.

Agdaldaliasat nga agpalaud ti Yamaha Crypton motorcycle a minaneho ni Avera, kasakayna ni Teddy Quitoriano y Pil, 25, baro, ken kalugaranna, idi pinaltogan dagiti suspek iti sumagmamano a daras a nakapuntaan ti ulo ken bagi ti retirado a polis.

Nakasarak dagiti inbestigador  iti 5 a kapsula a mapapati a nagtaud iti cal .45 iti nakapasamakan ti krimen.

Saan a narekobre dagiti inbestigador ti paltog a naaramat iti pammapatay ken negatibo ti resulta ti insayangkat dagiti polis a panagsukisok iti balay dagiti suspek.

Kaso a murder ti naipila maikontra kada Benny Camaddo y Ramos, 38, naasawaan, ken ni Nelson Duldulao, 29, agpada a residente iti Barangay Barbar, San Juan, Ilocos Sur ket nai-docket ti kaso iti babaen ti NPS No. I-03-INV-13J-00506.

Dagiti dua ti maitudtudo a  suspek iti pannakapapatay ni Roxan Jay Ventura y Sabugo, 29, baro, mannalon sadiay  Barangay Malamin, San Juan, Ilocos Sur idi agarup 11:40 ti rabii ti Oktubre 17.

Dead on the spot ni  Ventura idi pinaltogan dagiti suspek nga idi agangay ket nabigbig a da Camaddon ken Duldulao.

Sakbayna, naggiinom ti biktima ken sumagmamano a bisita iti maysa a kasangay iti kaarrubada ket idi aggawiden dagitoy, intulod pay ida ni Ventura ken ti kasinsinna a ni Nixon Erese y Ventura agingga iti traysikelda.

Tallo a nagsasaruno a putok ti nangeg ket nakita laengen ti biktima a naidalutaytay iti daga, nagsagrap kadagiti sugat iti likud.

Nakasarak dagiti nagres-ponde a polis iti tallo a kapsula ken maysa a bala manipud iti gauge 12 shotgun iti naka-pasamakan ti krimen.

Kabayatanna, frustrated murder ti naikaso maikontra kada Rodel Parbo, residente iti Barangay Maas-asin ken Jansen Usana, residente iti Barangay Patong, agpada nga iti ili ti Magsingal mainaig iti pannakapaltog ni Marcelino Ullero y Umoquit,7, naasawaan, mannalon, ken residente iti Sitio Baybayabas, Barangay Maas-asin, Magsingal.

Maipalagip a pinaltogan dagiti suspek a nakalugan iti nangisit a motorsiklo ni Ullero idi agsapa ti June 23, 2013.#