6 tatadien a manok, natakaw

STO. DOMINGO, Ilocos Sur – Innem a para pallot a manok ti naireport a natakaw iti pakatartaraknanda a talon sadiay Barangay Binalayangan, ditoy nga ili a mapattapatta a naiwayat idi rabii ti Disiembre 8.

Iti reportna iti polis, kinuna ni Dominador Guzon y Villanueva, 49, nars, a natakaw ti innem a tatadien a manokna nga agbalor amin iti P30,000.00.

Segun ken ni Guzon, adda pay laeng dagiti tatadien a manokna idi pimmanaw iti talonna agarup 5:00 ti malem ti Disiembre 8.

Ngem naduktalan laengen ni Guzon nga awanen dagiti innem a manokna bayat ti panagpakanna kadagiti tarakenna idi agarup 7:30 ti agsapa iti kabigatanna.

Iti pannakaisurat daytoy, di pay ammo no asino ti nangkurimes kadagiti manok ni Guzon.#