6 ubbing nabtakan iti paputok

STO. DOMINGO, Ilocos Sur – Innem nga ubbing nga agnaed iti maysa a barangay ditoy nga ili ti nagbalin a biktima ti paputok, uppat nga aldaw kalpasan ti selebrasion ti isasangbay ti baro a tawen.

Nakaawat ti police station ditoy iti report a lima nga ubbing nga agnaed iti Barangay Camestizoan, ti nagbalin a biktima iti bimtak a paputok ket naitarayda amin iti ospital gapu kadagiti sinagrapda a dunor.

Nainaganan dagiti biktima a pasig nga ubbing a da Charles Adrian Frueldan y Peros, 5; Aljur Velasco y Flaris, 2; John-win Pagador y Flaris, 6; Mark John Peros y Galano, 6; John Carlo Dulay y Tablac, 5; ken John Mark Velasco y Flaris, 8, agpapada nga agnaed iti nadakamat a barangay.

Naitaray dagiti biktima iti Gabriela Silang General Hospital, Vigan City, malaksid ni John Carlo a naipan iti Magsingal District Hospital.

Naammuan iti inisial nga imbestigasion a sakbay ti aksidente, idi agarup 5:45 iti malem ti Enero 4, nagay-ayam dagiti ubbing iti sirok ti salamagi ket nagpidutda kadagiti agkaiwara a rebentador a saan a bimtak, binungonda iti papel agraman ti maysa a bato sada tinaltal babaen ti sabali a bato a puon ti bimtakan dagitoy.

Saan unay a nadangran dagiti uppat kadakuada ngem dua ti nagsagrap iti nakaro a pakaibilangan ni John Mark.

Segun iti report, agpeggad a maputdan ti maysa a ramay ni John Mark.#