Footer

6 wanted persons, naggigiddan nga inaresto ti polis

CERVANTES, Ilocos Sur – Innem a wanted person a nagsalungasing iti anti-illegal gambling law ti naggigiddan nga inaresto ti kapolisan ditoy idi agtapos ti bulan ti Agosto.

Iti inwayat ti kapolisan a simultaneous arrest idi agarup 3:20 ti malem ti Agosto 31, naaresto da Andres Aguirre y Capacap, Jr., 32, naasawaan, residente iti Brgy. Rosario, Cervantes, Ilocos Sur; Rosendo Madalino y Saquito, 52, naasawaan, residente iti Brgy. Comillas South, Cervantes; Reynaldo Pimentel y Valencia, 63, naasawaan, residente iti Brgy. Comillas North, Cervantes; Lucio Totanes y Martin, 55, naasawaan, residente iti Brgy. Comillas South, Cervantes; Rygie Dumansi y Inyaka, 31, naasawaan, residente iti Brgy. Aluling, Cervantes, ken Raul Winder Pinge y Palasi, naasawaan, residente iti Brgy. Comillas South, Cervantes.

Imet dagiti polis idi inarestoda dagiti akusado ti warrant of arrest nga inyisio ni Judge Mario Anacleto M. Banez ti Regional Trial Court, Branch 25 idi pay laeng Hunio 20, 2016.

Akusado amin dagitoy iti panagsalungasing iti Presidential Decree 1602 kas inamendar ti Seksion 3(c) mainaig iti Seksion 4 ti RA 9287 a naipababaen iti Criminal Case No. 1547-T para iti pannakasentensiada.

Naipan dagiti akusado iti police station para iti dokumentasion sakbay a naipaimada iti maseknan a korte.

Kas sagudayen ti PD 1602 ken kas panangamendar ti RA 9187, maipakat ti naing-inget a pannusa iti asinoman a matiliw iti aniaman a kita ti illegal a sugal. (Tawid News)