Footer

615 baboy impataraken ti NTA kadagiti agmulmula iti tabako

CANDON CITY – Nasurok nga innem a gasut a baboy ti naipatarakenen ti National Tobacco Administration kadagiti agmulmula iti tabako iti maikadua a distrito ti probinsia, segun iti acting manager.

Kinuna ni Estrella de Peralta, acting manager ti NTA, Candon City Branch, a nasuroken a dua gasut a mannalon ti tabako ti naikkan iti taraken a baboy tapno adda kanayonan a pamastrekanda.

Iti interbiona iti DZTP Radio Tirad Pass, kinuna ni de Peralta nga ited ti opisinada dagiti kasapulan dagiti tobacco farmers iti panagtarakenda kadagiti baboy kas iti pagpakanda a feeds, agas ken technical assistance tapno napintas ti panagdakkel dagitoy.

Inyunay-unayna a mataraken  dagiti baboy iti uneg ti 105 nga aldaw, ket masapul nga agdagsendan iti 85 kilos santo alaen ti Multi-Line Food Processing Plant.

“Gatangenmi met laeng dagitoy a baboy tapno mapartida ken maproseso a tosino, tapa ken dadduma pay a meat products,”  kinuna ti acting manager.

Kabayatanna, agdagupen iti 205 dagiti napili a mannalon a naikkan iti saggatlo a baboy a taraknenda ket manamnama a manayonan pay ti bilangda.

“Nakasaganan ti panagiwarasmi iti mataraken a baboy iti sangapulo a mannalon iti Nagbukel, Narvacan ken Burgos,”  kinuna ni de Peralta.#