Footer

63 estudiante, recipiente ti SAFE Loan

Vigan City – Aganay  uppat a gasut a ribu a pisos ti nagbibingayan dagiti innem a pulo ket tallo nga estudiante iti maysa a pagadalan ditoy probinsia kas Scholarship Assistance Fund for Education (SAFE) loan iti naangay a programa iti kapitolio idi Nobiembre 24.

Sinaksian da pasado bokal Anne Morales, Ilocos Sur Community College  Administrator Carmencita Reyes-Paz ken Assistant College Head Amador Rojo ti pannakaibunong ti nadakamat a soft loan kadagiti estudiante.

Iti interbio ken ni Commission on Higher Education (CHED) Regional Director Evelyn Pascua, kinunana nga umabot iti P8,000 ti mabalin a buloden ti maysa nga estudiante para iti kasapulanna nga agadal.

“Saan ngamin a maka-avail amin nga estudiante iti scholarship isu nga inrugi ti CHED ti SAFE loan idi 2004. Maipangpangruna ditoy dagiti estudiante iti third ken fourth year level,” inlawlawag ti director.

Innayon pay ti regional director a mabayadan ti loan iti uneg ti dua a tawen wenno nababbaba.

“Saantayo koma a patayen daytoy a programa babaen ti diyo panagbayad. Kadagiti nagannak, imonitoryo a nasayaat dagiti annakyo tapno masigurado nga iti panagadalda ti pakaiturongan dagiti loanda,” indawat ni Pascua.

Kinuna ni Pascua nga isagsagana metten ti CHED Region I ti sabali pay a P200,000 a mapan iti ISCC kas nayon a pondo ti SAFE loan para kadagiti agad-adal ditoy.#