64 polis, nagidonar iti dara

SAN FERNANDO CITY – Innem a pulo ket uppat a personnel ti Police Regional Office 1 (PRO1) ti nagidonar iti dara kas paset ti blood-letting activity a naangay iti grandstand ditoy idi Pebrero 23.

Kinuna ni Police Chief Supt. Franklin Jesus B. Bucayu, Region 1 police director, ti panagidonar dagiti polis iti dara ket maysa kadagiti aktibidad a nakalinia iti PNP mainaig iti selebrasion iti Bulan ti Ayat babaen ti tema a “Dugong Pandugtong Buhay, Kapulisan Handang Mag-alay.”

Agdagup iti 28,800 cc a dara ti indonar dagiti 45 a personnel manipud iti Regional Training School 1, 11 manipud iti Regional Public Safety Battalion 1, 7 manipud iti PRO1 regional headquarters, ken maysa manipud iti National Support Unit.

Maideposito daytoy iti Ilocos Training and Regional Medical Center, nakasagana a pangsustener iti “Sagut a Biag”, proyekto ti police-community relations division nga idadauluan ni Police Senior Superintendent Reynante G. Partible.

Panggep ti “Sagut a Biag” ti pannakaipromot ti naintaoan nga aramid a panagidonar iti dara tapno masigurado ti umdas, safe ken nalaka a suplay ti dara para kadagiti personnel ti PNP, dagiti pamiliada ken nakurapay a miembro ti komunidad.#