CAMP BGEN OSCAR M FLORENDO – Innem a pulo ket lima a babbai a polis ti nagturpos iti special course for Women and Children Protection Desk (WCPD) itay Septiembre 10.
Karaman kadagiti nagturpos iti 10-aldaw a klase a nangrugi idi Agosto 28 ti uppat a police commissioned officers (PCOs), ken 61 a Police Non- Commissioned Officers.
Naiyadal ti nasao a kurso kas nailinia iti programa ti PNP a panangnayon iti awareness ken pannakabael dagiti WCPD personnel iti panangtamingda kadagiti isyo mainaig iti proteksion dagiti awanan bael a sektor ti sosiedad partikular dagiti babbai ken ubbing.
Iti bitlana, kinuna ni Police Senior Supt. Alexander A. Pumecha, Deputy Regional Director for Operations, a saan koma a trataren ti domestic violence kas pribado a banag idinto a kinaritna dagiti policewomen a mangipaayda iti naasi a relasionda kadagiti biktima tapno mapasublida ti panagtalekda ken kumpiansa nga agipulong kadagitoy a kinadamsak.
Impeksa ni Pumecha ti namnamana a babaen daytoy a panagsanay, maikkan iti solusion ti domestic violence nangruna ita ta umad-adu dagiti kaso ti panagrames no maikumpara kadagiti kallabes a tawen.#