7 a taga-Ilocos Sur, nagsasaruno a baro a Covid-19 positive

UPDATE (Hulio 27, 2020) β€” Kalpasan a maipablaak daytoy a damag, dua pay a kaso ti Covid-19 ti nainayon idi kalman Hulio 26 iti bilang dagiti positibo ditoy probinsia. Dagiti baro a kaso ket pareho a locally stranded individuals nga addaan iti travel history manipud National Capital Region. Ni IS-C14 ket 48-anios a lalaki a naka-quarantine sadiay Regional Evacuation Center, Brgy Ayusan, Vigan City. Ni IS-C15 ket 28-anios a babai nga adda iti quarantine facility ti Brgy Paras, Sta. Lucia.

VIGAN CITY β€” Adda pito a nagsasaruno a taga-Ilocos Sur a nagpositibo iti Coronavirus 2019, isu a kasapulan ti nainget a pannakaipatungpal dagiti nayetnag a guidelines ken health protocols, ken pannakakontrol dagiti agawid ken agsubli iti probinsia tapno malapdan ti pannakaakar dagiti umili iti mapagam-amkan a virus.Β 

Dayta ti nakompirmaran iti Ilocos Sur Covid-19 Provincial Action Center nga idauluan ni Gov. Ryan Luis Singson maipapan ti pagdurdur-asan ti pannakalapped ti panagraira ti virus iti probinsia.

Nairakurak nga iti naglabas a lawas ket adda nagsasaruno a pito a baro a kaso ti Covid-19 iti probinsia.

Kadagiti tallo a kaudian a naduktalan a positibo iti Covid-19, dua ti agpada a taga-Vigan City ken maysa a taga-Bantay.

Maysa a lalaki a utility worker a taga-Brgy. Pong-ol, awanan ti travel history a rimmuar iti probinsia ngem adda exposure-na kadagiti locally stranded individual ken returning overseas Filipino workers. Ti sabali a positive ket taga-Brgy. Pantay Fatima, maysa a nagawid nga OFW manipud Saudi Arabia, ken dimmagas sadiay Metro Manila. Ken ti kaudian ket maysa a security guard iti BDO Quezon Ave. branch a residente iti Zone III, Bantay.

Dagiti pasiente ket addadan a naka-quarantine, ken maipakpakaten ti tumutop a community quarantine kadagiti pagnaedanda, ken contract tracing kadagiti nakalangenda. 

Sakbay dayta, adda pay dua nga immuna a natakuatan a nagpositibo ti Covid-19 – ti lalaki a taga-Poro, Magsingal, Ilocos Sur a napan sadiay National Capital Region idi Hunio 8, ken adda dua a kaduana, ket nagawidda idi Hulio 2. Immuna a naitarus ti pasiente ken kakaduana iti Magsingal quarantine facility. Addan ti pasiente iti Ilocos Sur Provincial Hospital – Magsingal.

Ti sabali pay a kaso ti Covid-19 positive ket ti babai a residente iti Brgy. Calungboyan, Candon City, maysa a saleslady ti merchandise store sadiay Rodriguez, Rizal. Nagawid sadiay Candon City ti pasiente a kaduana ti partner-na idi Hulio 19, ket dagus a nag-report sadiay City Health Office, ken naipan sadiay ISPH – Magsingal.

Sakbay dayta, adda immuna a dua a taga-Candon City ken drayber ti maysa a transport company nga agitultulod kadagiti agawid nga OFW ken LSI iti nagduduma a probinsia iti Luzon. Ti maysa a drayber ket taga–Brgy. Bagani Ubbog, ken ti sabali pay ket taga-Brgy. Patpata Segundo.

Nagbalinen a tallo dagiti aktibo a kaso ti Covid-19 idiay Candon City, ket saanda pay laeng nga agawat iti LSI manipud Hulio 23 agingga inton Agusto 5.

Naipakaammo pay a naipakaten ti extreme enhanced community quarantine kadagiti lugar a pagnaedan dagiti pasiente ken kakaduada. Agtultuloy metten ti contract tracing kadagiti nakapulapol dagiti pasiente. 

Maysa a lawas ti napalabas sakbay dagiti kaudian a Covid-19 positive, nairakurak dagiti nagsaruno a nagpositibo iti virus – ti security guard a taga-Ibuy, San Ildefonso, ken ti opisial ti Philippine National Police. Nasayaaten ti kasasaad dagitoy a dua a nagpositibo iti Covid-19.

Naamuan a naan-anayen a nasayaaten ti kasasaad ti salun-at dagiti nagpositibo ti Covid-19 – ti nataengan a babai a taga-Magsaysay, Tagudin; ti babai a nurse a taga-Sevilla, Sta. Cruz; ti babai nga overseas Filipino worker a taga-Pantay Daya, Vigan City; ken ti lalaki nga authorized person outside residence a taga-Quinarayan, Narvacan.

Nairakurak nga awan pay ti maibilang a local transmission iti Ilocos Sur, ta dagiti nagpositibo ket karamanda iti kategoria ti LSI, OFW ken APOR. Naidarirag a nasken ti pannakakontrol dagiti LSI ken OFW nga agawid wenno agsubli iti Ilocos Sur no awanen ti pagyananda kadagiti quarantine – isolation facilities dagiti local government units tapno malapdan ti panagraira ti Covid-19 iti probinsia.

Iti immun-una a pannakiuman ni Gov. Singson iti media, impakaammona a mapalubosanton iti Ilocos Sur nga agkasakay iti motorsiklo dagiti agassawa ken agkabbalay a saanen a ksapulan ti protective barrier – shield iti nagbaetan ti drayber ken ti kalubbonna.

Impalgakna a kiniddawna nga umanayen ti panagaruat iti facemask ken helmet dagiti agkalubbon iti motorsiklo kas proteksionda iti pannakaakar iti Covid-19 ken aksidente.

Kiniddawna kadagiti umili nga iyurayda laengen ti guidelines nga ipaulog ti Regional Inter-Agency Task Force on the Emerging Disease mainaig iti panagkalubbon iti motorsiklo tapno malisian ti pannakasitar dagiti pannakabagi ti linteg.  

Iti mainaig a damag, gapu iti pannakatakuat dagiti nagsaruno a kaso iti Covid-19 iti Ilocos Sur, isayangkat ti Provincial Government ti swab testing kadagiti agduduma a sektor kangrunaanna dagiti frontliners tapno malapdan ti panagwaras ti virus. ●