7-bulanna nga ubing, nakalasat iti aksidente

CANDON CITY – Ibilang dagiti nakasaksi iti aksidente a milagro ti saan a pannakadangran ti pito ti bulanna nga ubing idinto a natay ti amana ken nasugatan ti inana ken maysa pay a kinaluganda iti kotse iti aksidente a napasamak iti Barangay Langlangca 2nd idi parbangon ti Mayo 2.

Saan a nasugatan iti aksidente ni Aldin, anak da Alejandro dela Cruz y Mariano, 33, naasawaan, ken residente iti Barangay 24, Rizal St., Laoag City ken ni Brenda de la Cruz, 24, ngem awanen ti biag ti ama idi maidanon iti Candon General Hospital gapu iti nakaro a sugatna iti ulo.

Nagsagrap met iti dunor ni Brenda ken ni Donel Garabiles, 22, baro, residente ti Sitio Namnama, Barangay Calaoaan, Candon City.

Mapapati a napukaw ti kontrol ni de la Cruz iti manibela ti Suzuki Alto a minanehona bayat ti panagdaliasatda iti Barangay Langlangca 2nd ket naturong ti lugan ti agpalaud nga abaga ti kalsada sa dinungparna ti puon ti mangga.

Nakaro ti dadael ti sungo ti lugan.#