7 kameng ti grupo agtaktakaw iti motorsiklo tiniliw dagiti polis

VIGAN CITY – Nanabtuog iti ima dagiti pannakabagi ti linteg ti sabali pay a grupo dagiti agtaktakaw iti motorsiklo kalpasan a natuntonan dagiti polis ti nakaipaknian dagiti tinakawda ditoy siudad ken iti Caoayan idi rabii ti Abril 23.

Kinuna ni Police Chief Inspector Ernesto Navarro, Jr. OIC ti Vigan City police station nga inyussuatda ti maysa nga operation idi rabii ti Abril 23, kaduada dagiti police Caoayan nga indauluan ni PoliceĀ  Senior Inspector Edmar Quiton, iti Barangay Villamar, Caoayan kalpasan a nakaawatda iti impormasion ti kaadda ti maysa a natakaw a motorsiklo iti nadakamat a lugar.

Immuna a natiliw ni Clifford Tugade kalpasan a narekobre dagiti nagtipon a bunggoy ti polis Vigan ken Caoayan ti maysa a maris duyaw nga XRM motorcycle iti ikut ti suspek babaen ti insayangkatda nga operasion iti nadakamat a barangay.

Iti insayangkat dagiti inbestigador a tactical interrogation ken ni Tugade, innagananna dagiti a kakaduana a pakairamanan ti uppat a menor de edad.

Nabigbig dagiti suspek a da Steven Ramil dela Cruz, 24, naasawaan, ken residente ti Barangay Camanggaan, Vigan City; Clifford Tugade y Quillopo, 19, baro, residente iti Barangay Camangaan; Michael Vincent Bragado y Queppet, 24, naasawaan ken resident iti Barangay Camangaan, Vigan City; Franklyn Bragado y Queppet, 17, baro, ken residente iti Barangay Camangaan, Vigan City; John Mar Navarro y Anicas, 17, baro ken residente iti Barangay Anonang Mayor, Caoayan, Ilocos Sur; Rustom Quilana y Figuerres, 16, baro, ken residente iti Brgy Camangaan, Vigan City; ken Remart Quiba y Tacal, 16, baro ken residente iti Barangay Anonang Mayor, Caoayan, Ilocos Sur.

Ni dela Cruz ti maitudtudo a lider ti grupo.

Kanaig daytoy, nabuangay ti maysa a bunggoy dagiti nagtipon nga elemento ti Vigan City Police Station nga indauluan ni Police Senior Inspector Mario R. Badiola ken Police Inspector Glenn M. Dulay iti babaen ti direkta a superbision niĀ  Navarro, ken ti Caoayan Police Station nga indauluan ni Quiton a nangisayangkat iti follow-up operasionĀ  a nagtungpal iti pannakarekobre dagiti motorsiklo a natakaw iti siudad ken Vigan ken iti Caoayan iti kallabes.

Kinuna ni Navarro a modus operandi ti grupo a pagsisinnukatenda dagiti piesa dagiti tinakawda a motorsiklo tapno narigat a mailasin ti akinkukua.

Kinuna pay ni Navarro nga inannugot ti grupo aĀ  tinakawda dagiti motorsiklo iti Gabriela Silang General Hospital, iti sango ti Mart One, iti galiera, iti tiendaan publiko iti Vigan ken dadduma pay a lugar a didan matandaanan.

Iti pannakaisurat daytoy, isagsaganan dagiti polis ti kaso maikontra kadagiti suspek.#