Footer

7 lalaki, naaresto bayat pot session

STA. CATALINA, Ilocos Sur – Pito a lalaki a pakairamanan ti maysa a menor de edad ti natiliwan a madama ti pot sessionda iti uneg ti maysa a balay iti asideg ti pagadalan iti Poblacion ditoy idi agsapa ti Hulio 10.

Nagresponde a sigida ti kapolisan ken barangay officials idi nakaawatda iti mensahe nga adda mapaspasamak a pot session iti nadakamat a balay ngem idi makasangpetda, mapapati nga imbato ni John Kenneth Gorospe y Tagorda, 22, awanan asawa, construction worker, ken residente iti Barangay Lubong, ti maysa a plastic sachet a nagkarga iti mapapati a nagango a marihuana.

Kasta met nga idi rinikisa dagiti polis dagiti suspek, nakasamsamda iti maysa a plastic sachet a nagkarga iti mapapati a napagango a mari-huana.

Malaksid ken ni Gorospe, nakasuan iti Office of the Clerk of Court, Regional Trial Court, Vigan City, Ilocos Sur iti panaglabsing iti Section 11 ti RA 9165 a nai-docket iti babaen ti Criminal Case Nos. 8044-V-2016;  8045-V-2016;  ken 8046-V-2016 da Reynald Reduca y Fariñas;  ken Jake Rayray y Rapisura, 20, awanan asawa, residente iti Barangay Poblacion, Sta. Catalina, Ilocos Sur.

Panaglabsing iti Section 15 ti RA 9165 a nai-docket iti babaen ti Criminal Case Nos. 8047-V-2016 ken 8048-V-2016 ti naipila maikontra kada Peter Rabo y Garalde, 20, awanan asawa; ken Arvin Raguindin y Rosimo, 18, awanan asawa, mannalon, residente iti Brgy Tamorong.

Agsipud ta awan ti nakapkapan nga illegal a droga ken negatibo ti resulta ti drug test kenkuana, nadismis ti kaso maikontra ken ni Christian Pesada y Bides 18, awanan asawa, residente iti Brgy Poblacion.

Gapu ta menor de edad, naipaima iti MDSWD office ni Joshua Rabo y Revibes, residente iti Barangay Poblacion, Sta Catalina, Ilocos Sur.

Kabayatanna, positibo a marihuana ti nakumpiska dagiti polis iti ikut ti dua nga estudiante iti mismo nga uneg ti Magsingal National High School idi malem ti Hulio 8.

Agdagup iti 20.3417 ti dagsen ti illegal a droga a nakumpiska a masuspetsa a mailako kadagiti estudiante ditoy a pagadalan ken dadduma pay a kadarappatna a pageskuelaan.

Kalpasan a nakaawatda iti mensahe nga adda naiserrek a droga iti nasao a pagadalan, nangiwayat da George Costales Urubio, prinsipal ti nasao a pagadalan, ken polis-Magsingal iti panagkapkap kadagiti senior students ket nasiputanda ni John Carlo Unciano y Sarmiento, 16, Grade 11, ken residente iti Barangay Patong, Magsingal, a nangipalladaw iti maysa a plastic sachet a nagkarga iti mapapati a bulong ti marihuana.

Iti panagpalutpot dagiti polis ken ni Unciano, kinunana a naggapu ken ni Allen Usana y Ceria, 15, Grade 10, ken residente iti Barangay Patong, ti sangabag a bulong ti marihuana.

Naipaima iti MSWDO da Unciano ken Usana agsipud ta agpadada a menor de edad.#